رۆژنامه‌كا له‌نده‌نى:پارتى وئێكه‌تى دێ سه‌رۆك وه‌زيرێن داهاتى ئێكلاكه‌ن
ئه‌ڤرۆنيوز:
رۆژنامه‌كا له‌نده‌نى ئاشكراكر، بۆ پێكئينانا مه‌زنترين هه‌ڤپه‌يمانى، به‌ره‌يێ سه‌در وعه‌بادى دشێن 150 كورسيان كۆم بكه‌ن، به‌ريێ مالكى وعامرى ژى 140 كورسيان، ليستێن پارتى وئێكه‌تيێ بۆ هه‌ردولا دێ ئێكلاكه‌ر بن، هه‌تا نوكه ژى وان بريارا ئێكلاكه‌ر نه‌دايه، دده‌مه‌كى دا پێزانين به‌حس ل وێ چه‌ندێ دكه‌ن كو ئه‌و دێ چنه دناڤ هه‌ڤپه‌يمانيا مالكى وعامرى دا.
رۆژناما (الحياه) يا له‌نده‌نى ژزارێ ژێده‌ره‌كى ئاشكراكر” دانوستاندنێن دناڤبه‌را موقته‌دا سه‌در وحه‌يده‌ر عه‌بادى وعه‌مار حه‌كيم يێن به‌ر ب دووماهيێ ڤه دچن وتنێ يا ماى ناڤه‌كى بۆ هه‌ڤپه‌يمانيا خوه بينن ول سه‌ر رێكبكه‌ڤن وهه‌ڤپه‌يمانيا وان دێ فراكسيۆنێن سونى وكوردى ژى تێدا بن وسه‌رجه‌مێ كورسيێن وێ هه‌ڤپه‌يمانيێ دێ 150 كورسى بن، ب گۆره‌ى دستوورى عيراقى ژى پێدڤيه 165 كورسى كۆم بكه تاكو ببن مه‌زنريت فراكسيۆنا په‌رله‌مانى”.
سه‌رجه‌مێ كورسيێن سه‌در وعه‌بادى وحه‌كيم دگه‌هيته 116 كورسيان، ل گه‌ل كورسيێن هه‌ڤپه‌يمانيا قه‌رار يا سونى ب سه‌رۆكاتيا خه‌ميس خه‌نجر وهه‌ڤپه‌يمانيا وه‌ته‌نيه ب سه‌رۆكاتيا ئه‌ياد عه‌لاوى هژمارا كورسيێن وان دێ گه‌هنه 150 كورسيان.
پێزانين دووپات دكه‌ن كو هه‌ر ئێك ژ ليستا فه‌تح ب سه‌رۆكاتيا هادى عامرى وليستا ده‌وله‌تا قانوونێ ب سه‌رۆكاتيا نورى مالكى وپارتى وئێكه‌تى دێ هه‌ڤپه‌يمانيێ گرێده‌ن وسه‌رجه‌مێ كورسيێن وان دێ گه‌هنه 140 كورسيان،
به‌لێ ژێده‌ر دياردكه‌ن كو هه‌تا نوكه پارتى وئێكه‌تى نه‌گه‌هشتينه رێككه‌فتنا دووماهيێ ل گه‌ل مالكى وعامرى ونوكه هه‌ردو به‌ره‌يێن شيعى چاڤه‌رێ كوردانه وليستين پارتى وئێكه‌تيێ يێن بووينه كارتا ئێكلاكه‌ر بۆ پێكئينانامه‌زنترين فراكسيۆنا په‌رله‌مانى ودياركرنا سه‌رۆك وه‌زيرێن داهاتى يێ عيراقێ.