رۆژنامەڤانەک بەحس ل پشکداریا سەرۆک کۆمارێ عیراقێ ل گۆپیتکا سەقای ل فرەنسا دکەت
ئەڤرۆ نیوز:
رۆژنامەڤانەکێ عیراقی یێ ئاکنجیێ پاریس پایتەختێ فرەنسا، د داخۆیانیەکێ دا بۆ رۆژناما ئەڤرۆ بەحسێ پشکداریا سەرۆکێ کۆمارا عیراقێ د کۆپیتکا سەقای ل پاریس کر و گوت پشکداریەکا نە سەرکەفتی بوو و پەیڤا سەرۆکێ عیراقێ ل ھۆلا سەرەکی یا کوپیتکی نەھاتە خواندن و شاندێ عیراقێ ژ 84 کەسان پێک دھات کو ھندەک ژوان ئەندامێن خێزانا سەرۆک کۆماری بوون.
سەیف ئەلخەیات رۆژنامەڤانێ عیراقێ ل پاریس بۆ ئەڤرۆ گوت” پشکداریا شاندێ عیراقێ د کوپیتکا جیھانی ل دۆر سەقای یا سەرکەفتی نەبوو و دیاربوو کو گونجاندن د دەزگەھێ سەرۆکاتیا عیراقێ دا نینە”.
خویاکر ژی”دەمێ کاروانێ ترومبێلێن سەرۆک کۆماری گەھشتیە جھێ پێشوازیا سەرۆکان، سەرۆکێ فرەنسی (فرانسوا ئۆلاند) ل پێشوازیا وی نەبوو وەکو پێشوازی ل ھەموو سەرۆکێن دی کری، بەلکو تنێ (لوران فابیۆس) وەزیرێ دەرڤەیێ فرەنسا ل پێشوازیا وی بوو”.
سەیفی دیارکر ژی” د رۆژانێن کوپیتکێ ئەز ل ھۆلا کونترۆلا رۆژنامەڤانی بووم، دەمێ سەرۆک کۆمارێ عیراقێ (فوئاد مەعسوم) پەیڤا خوە خواندی، مخابن ل ھۆلا سەرەکی یا کوپێتکی نەھاتە خواندن، بەلکو ل ھۆلا (لوی) خواند کو ئەو ناڤێ رووبارەکێ بچووکە ل فرەنسا، بەلێ ھۆلا سەرەکی یا کوپیتکێ ناڤێ وێ (سین) بوو کو ئەو ژی ناڤێ گرنگترین رووباری یە ل فرەنسا کو دناڤ پاریس ڕا دچیت”.
دیسا گوت” دەمێ سەرۆک کۆماری پەیڤا خوە دخواند، ھۆل یا ڤالابوو و تنێ ھژمارەکا کێم ژ بەرھەڤبوویان پێ حەسیان و ئەوێن دەست ژی بۆ پەیڤا وی قوتاین، ھژمارەکا کێم بوو، دیسا د پەیڤا خوەدا، ل شوینا بێژیت (التعریە) کو زاراڤەکێ بەربەلاڤە د زانستێ سەقای و جوگرافیێ دا، بەلێ سەرۆکێ کۆماری ل شوینا وێ پەیڤێ گوت (التعری)”.
ل دۆر وێ چەندێ کو ھژمارەکا وەلاتێن دی ژی پەیڤێن خوە ل ھەمان ھۆلێ خواندن، سەیف ئەلخەیات گوت” راستە، بەلێ ئەو وەلات نە د وێرانکری بوون وەکو عیراقێ، کو پتریا سەرۆک و بەرپرسێن مەزنە وەلاتێن جیھانێ د پشکداربوون و پتریا بابەتێن وێ کوپیتکێ ب بابەتێن عیراقێ ڤە د گرێدای بوون، ب تایبەتی تیرۆر و سەقا و پێدڤی بوو سەرۆک کۆمار یێ کاریگەر با د پشکداریا خوەدا و پێدڤی ژی بوو وەزارەتا دەرڤە یا عیراقێ بەرنامەکێ بەرفرەە ئامادەکربا و دڤێت سەرۆک کۆماری گۆتارەکا ژێر و گرنگ پێشکەش کربا کو سەرنجا رایا گشتی یا جیھانێ کێشابا و پێدڤی بوو گۆتارا خوە ل دەڤ پتریا سەرۆکێن وەلاتێن مەزن و زلھێز پێشکەش کربا و ل دەمەکێ زوو ژ رۆژا ئێکێ یا کوپیتکێ، نەکو ل دووماھیا شەڤی و ل دەمژمێر 9 و پێنج خۆلەک”.
ل دۆر شاندێ عیراقی یێ ل گەل سەرۆک کۆماری چوویە پاریس، سەیف دبێژیت” ھژمارا وان 86 کەس بوون کو ھندەک ژوان ژ خێزانا سەرۆک کۆماری بوون و ھندەک ژ ئۆفیسا وی بوون کو ھەلگرێن ھندەک پۆستێن نە گرنک بوون و تنێ ئەندامێن ئۆفیسا سەرۆک کۆماری 31 کەس بوون ل دووڤ نڤیسارا ئیفادێ ئەوا گەھشتیە وەزارەتا دەرڤە”.
گوت ژی” مەقێود مەعسووم برایێ سەرۆک کۆماری و سەفیا سوھێل بالیۆزا عیراقێ ل ئوردنێ و ھەڤژینێ وێ بەختیار ئەمین و گەلەک کەسایەتیێن دی ل گەل سەرۆک کۆماری بوون کو چو پەیوەندیا وان ب سیاسەتێ و تیرۆرێ و سەقای ڤە نەبوو،بەلکو ھەلبەستڤان و ئەدیبەکێ بەرنیاس ژی دگەلدا بوو”.
ناڤبری دیارکر ژی کو مەزاختیێ شاندێ عیراقێ نێزیکی 250 ھزار یۆرۆیان بوون، ئەوژی خەرجیێن ئۆتێلان بۆ ھەموو شاندی و خەرجیێن فرۆکێ و مانا وێ بۆ دەمێ چار رۆژان ل فرۆکخانێ و دەرمالێن ئیفادێ و …ھتد”.
خویاکر ژی کو ئیبراھیم جەعفەری وەزیرێ دەرڤەیێ عیراقێ ل رۆژا دویێ ب تۆرەیی ڤە پاریس بجە ھێلا و دبیت بریارا گوھۆرینا بالیۆزێ عیراقێ ل فرەنسا بدەت”.
