رۆژنامەکا بریتانی: بەشار ئەسەد دێ بیتە پەنابەر

ئەڤرۆ نیوز:
رۆژناما ئیندێپێندێنت یا بریتانیا د راپۆرتەکێ دا دوھی راگەھاند کو پشتی کۆمبوونا وەلاتێن G٧ ل ئەلمانیا شاندەک ژ وەلاتێن رۆژئاڤا و ئەمریکا ل گەل شاندەکێ روسیا سەبارەت ب شەرێ ل دژی داعشێ و قەیرانا سووریێ و ئوکرانیا ھەڤدیتنێن گرنگ ساز کرینە و گەھشتنە رێککەڤتنەکێ و د ناڤا سالەکێ دا دێ قەیرانا سووریێ چارە بیت و دێ پاشی ژی سەبارەت ب شەرێ ل دژی داعشێ وەلاتێن زلھێز پێکڤە شەری بکەن دا د ناڤ دو سالان دا داعش ب تەمامی ژناڤ بچیت.
د بەردەوامیا راپۆرتێ دا ھاتیە دیار کرن کو ئەمریکا پێشنازەک دایە روسیا کو بھێلیت بەشار ئەسەد و خێزانا وی وەک پەنابەر ل روسیا ئاکنجی ببن و گەرەنتیا ژیانا وان بھێتە دان و ھەتا وی دەمی ژی دڤێت کار بۆ دروست کرنا بەدیلەکێ ل سووریێ بھێتە کرن کو ئەو بەدیلە نە ژ ئیسلامیێن ھشکباوەر بن و نە ژی گرۆپێن دی و دڤێت ب رەنگەکێ باش ھاریکاریا بەرھنگاریا سووریێ بھێتە کرن دا ئەو بشێن پشتی بەشاری ب رێیا ھەلبژارتنان حوکمەتەکا بەروەخت ئاڤا بکەن.
د پشکەکا دی یا راپۆرتێ دا ھاتیە دیار کرن کو بەرپرسێن روسیا قەبوول کرینە مافێ پەنابەریێ بدەنە بەشار ئەسەد و خێزانا وی و ل ھەمبەر وێ یەکێ ژی داخواز ژ ئەمریکا کرینە کو ئێدی دەستێوەردانێ د کاروبارێ ناڤخوەیی یێ ئوکرانیا دا نەکەت، چونکو ئەو یەک مەترسیەکا مەزن بۆ ئارامیا ناڤخوەیی ل روسیا دروست دکەت و ئەمریکا ژی رازی بوویە کو ل گەل وەلاتێن ئوروپا بەرنامەکێ بۆ چارەکرنا قەیرانا ئوکرانیا دانێن و روسیا ژی پشکەک بیت ژ چارەکرنا قەیرانا وی وەلاتی.
د پشکەکا دی یا راپۆرتێ دا ھاتیە دیار کرن کو ئەمریکا و روسیا پشتی دیتن داعش ل سووریێ گەلەک پێشڤە دچیت و چو ھێزەک ژی نەشێت رێگریێ ل وان بگریت نەچار ماینە کو ل سەر ھندەک خالان رێکبکەڤن و روسیا و ئەمریکا ب چو رەنگەکێ رازی نابن کو داعش ل سووریێ ب ھێز کەڤیت و ژ بەر ھندێ ژی ئەمریکا مەرجێ دەست ژ کارکێشانا بەشاری و چوونا وی بۆ روسیا وەک مەرجێ سەرەکی دایە پێش و بەرپرسێن روسیا ژی ئەو یەک قەبوول کرینە و پشتی چوونا بەشاری دێ روسیا و ئەمریکا پێکڤە ل سووریێ شەرێ داعشێ بکەن و دێ وێ رێکخراوێ ژناڤ ببەن.
د دووماھیا راپۆرتێ دا ھاتیە دیار کرن کو سەرۆک وەزیرێن بریتانیا دێیڤید کامیرۆن رۆلەک سەرەکی بۆ وی پرۆژەی گێرایە و ل گەل سەرۆکێ روسیا ڤیلادەمیر پۆتین و سەرۆکێ ئەمریکا باراک ئۆباما ئاخڤیە و ھەر دو سەرۆک ژی رازی بووینە کو بۆ چارەکرنا قەیرانا سووریێ و ژناڤبرنا داعشێ ھاریکاریا ھەڤدو بکەن و پشتی چارەکرنا قەیرانا سووریێ دێ ل عیراقێ ژی ئەمریکا و روسیا ھندەک کاران پێکڤە بکەن، لێ روسیا و ئەمریکا گەھشتنە وێ باوەریێ کو ھەتا ل سووریێ داعشێ ژناڤ نەبەن دێ مەترسیا وێ ل سەر عیراق و لیبیا ھەر یا بەردەوام بیت و ژ بۆ کو بشێن پشتەڤانیا خەلکێ و بەرھنگاریا سووریێ بدەستڤە بینن دڤێت بەشار ژ دەستھەلاتێ بھێتە دوورخستن و بۆ وێ یەکێ ژی روسیا دێ رۆلەکا سەرەکی گێریت.

کۆمێنتا تە