رۆژنامەیەکا ئەمریکی: توندڕەوێن ئیرانێ ناهێلن پزیشکیان و قالیباف ل گەل ئەمریکا رێکبکەڤن
رۆژنامەیا وول ستریت جۆرنال یا ئەمریکی د راپۆرتەکێ دا ئاماژە ب ڤێ یەکێ کریە کو مەسعود پزیشکیان سەرۆک کۆمارێ ئیرانێ و محەمەد باقر قالیباف سەرۆکێ پەرلەمانێ ئیرانێ گەلەک بزاڤان دکەن دا ب رێیا دانوستاندنان پرسێن هەی ل گەل ئەمریکا چارەسەر بکەن، چونکی وان دڤێت شەرێ هەی ب دووماهی بینن دا بشێن رەوشا ئابووری یا ئیرانێ باش بکەن، چونکی نها ئیران تووشی قەیرانەکا گەلەک مەزن یا ئابووری بوویە و هەکە شەڕ بەردەوام بیت ئەو نەشێن رەوشا ژیانا خەلکی باش بکەن.
هەما رۆژنامێ ئەو یەک ژی دیار کریە کو توندرەوێن ئیرانێ ب تایبەتی ژی فەرماندارێن سوپایێ پاسداران فشارێن گەلەک مەزن ل پزیشکیان و قالیبافی دکەن و وەسا ددەنە دیار کرن کو رێککەفتنا ل گەل ئەمریکا خیانەتە و دڤێت شەڕ بەردەوام بیت، ئەو یەک ژی بوویە ئەگەر هەتا نها ئەمریکا و ئیرانێ نەشیاینە رێککەڤن و تێگەهشتنا کو بەری نها ژی هاتە ئیمزا کرن تنێ ل سەر کاغەزی مایە و نەهاتیە بجهئینان، چونکی توندرەوێن ل ئیرانێ رێ نادەن پرسێن هەی بهێنە چارەسەرکرن و نها پێگەهێ پزیشکیان و قالیبافی ژی ل ئیرانێ لاوازە و ئەو نەشێن بریارێن چارەنڤیسساز بدەن.
