رێبوار تاله‌بانی: هه‌كه شه‌ش سالان ژی بهێمه زیندانكرن هه‌لویستێن خوه ناگوهۆڕم
ئه‌ڤرۆ نیوز، ب. ئازاد نسری:
پشتی دادگه‌ها تێهه‌لچوونا كه‌ركووكێ دوهی فه‌رمانا گرتن و زیندانكرنا شه‌ش هه‌یڤان بۆ رێبوار تاله‌بانی سه‌رۆكێ جڤاتا پارێزگه‌ها كه‌ركووكێ ب وه‌كاله‌ت ده‌ركری، رێبوار تاله‌بانی ئه‌ڤرۆ د كۆنگره‌كێ رۆژنامه‌ڤانی دا ئه‌و بڕیاره ب سیاسی ب ناڤكر و راگه‌هاند، ئه‌و بڕیاره تۆلڤه‌كرنه ل هه‌مبه‌ر هه‌لویستێن مه و هه‌كه شه‌ش سالان ژی بهێمه زیندانكرن هه‌لویستێن خوه ناگوهۆڕم.
رێبوار تاله‌بانی ئاشكرا ژی كر كو هه‌تا نوكه 30 رێڤه‌به‌رێن كورد ژ كه‌ركووكێ یێن هاتینه ده‌رخستن و چو لایه‌نه‌كێ كوردی و عه‌ره‌بی و توركمانی هه‌لویست ل هه‌مبه‌ر ڤێ چه‌ندێ نه‌بوویه و سه‌دام حسێن هه‌مان كریار كرینه و پارێزگه‌رێ نوكه یێ كه‌ركووكێ ژی یێ هاتی وان كریارێن به‌عسیان دوباره دكه‌ت و دڤێت ئه‌و پارێزگه‌ره بهێته دادگه‌هكرن و گۆت:(ئه‌وا دهێته كرن دژایه‌تیكرنا دستوور و قانوونا عیراقێ یه و دێ هه‌موو بزاڤان بۆ ژناڤبرنا وان بڕیاران كه‌ین).
سه‌رۆكێ جڤاتا پارێزگه‌ها كه‌ركووكێ ب وه‌كاله‌ت دیار كر كو جاران تۆڕێن مه‌زن په‌ترۆلا كه‌ركووێ ددزی، لێ نوكه خه‌لكه‌ك هه‌یه ب پلا ئه‌فسه‌ر په‌ترۆلا كه‌ركووكێ ددزن، بۆچی داخوازكارێ گشتی یێ بێده‌نگه.
