رێكا گەشەپێدانێ د دهۆكێ را دەرباز دبیت
شیرەتكارێ سەرۆك وەزیرێن ئیراقێ بۆ كاروبارێن ڤەگوهاستنێ راگەهاند: رێكا گەشەپێدانێ ب درێژییا 11 كیلۆمەتران د پارێزگەها دهۆكێ دا دەرباز دبیت و ب رێكا پێشابیرێ دچیتە د ناڤ ئاخا توركیا دا.
د. ناسر ئەلئەسەدی، شیرەتكارێ سەرۆك وەزیرێن ئیراقێ بۆ كاروبارێن ڤەگوهاستنێ گۆت» نەخشەسازییا دووماهیێ یا رێكا گەشەپێدانێ یا تمام بووی، پڕۆژە ب درێژییا 11 كیلۆمەتران د پارێزگەها دهۆكێ دا دەرباز دبیت، ب رێكا دەرگەهێ پێشابیرێ دگەهیتە توركیا».
شیرەتكارێ سۆدانی ئاشكراكر ژی كو هەماهەنگییا تمام ل گەل حوكمەتا هەرێما كوردستانێ هاتیە كرن و كۆمبوون ژی ل گەل پارێزگەرێ دهۆكێ ل دۆر ڤی بابەتی یا هاتیە كرن.
سەبارەت قۆناغێن داهاتی، شیرەتكارێ سەرۆك وەزیرێن ئیراقێ بۆ كاروبارێن ڤەگوهاستنێ گۆت» د قۆناغا داهاتیدا هووربینییا نەخشان دێ هێتە كرن و پاشی دێ هێتە هنارتن بۆ بجهئینانێ».
د. ناسر ئەلئەسەدی ئاماژە ب وێ چەندێ ژی كر» ئەڤ پڕۆژە گەلەك یێ مەزنە و ب راوێژكرنێ ل گەل شیرەتكار و شارەزایێن نێڤدەولەتی یێ هاتیە ئەنجامدان، كو ئەڤ پڕۆژە دشێت ئیراقێ ببەتە قۆناغەكا نوو و هزاران دەلیڤەیێن كاری ژی بۆ گەنجان پەیدا بكەت» .
درێژییا پڕۆژەیێ رێكا گەشەپێدانێ هزار و 200 كیلۆمەترە و پێكدهێت ژ هێلێن ڤەگۆهاستنا كەلوپەل و گەشتییاران و هێلا ئاسنی، ژ بەندەرێ فاو ل پارێزگەها بەسرە دەستپێدكەت هەتا ناڤ ئاخا توركیا.
تێچوویێ پڕۆژەی ب 17 ملیار دۆلاران دهێتە خەملاندن، ژ وان 10 ملیار و 500 ملیۆن دۆلار بۆ كڕینا شەمەندەفەرێن كارەبایی یێن مودێرن و شەش ملیار و 500 ملیۆن دۆلار بۆ دروستكرنا هێلا ئاسنی دێ هێنە تەرخانكرن.
قۆناغا ئێكێ ژ پڕۆژەیێ گەشەپێدانێ ل سالا 2028 دێ تمام بیت، قۆناغا دووماهیێ ل سالا 2025 دێ تمام بیت.
