رێككەفتنا 11 ئادارێ بەرهەمێ خەباتا پێشمەرگەی و هەموو تەخ و چینێن كوردستانێ یە
دوهی سێشەمبی 11/3/2025، سەرۆك بارزانی د پەیامەكێدا ل سالڤەگەڕا 55 یا رێككەفتنا 11 ئادارا 1970 راگەهاند: ئەو رێككەفتن دەستكەفتەكا دیرۆكی وگرنگ یا خەباتا گەلێ كوردستانێ بوو ب رێبەرییا بارزانیێ نەمر.
دەقێ پەیاما سەرۆك بارزانی:
رێككەفتنا 11 ئادارا 1970 دەستكەفتەكا دیرۆكی و گرنگ یا خەباتا گەلێ كوردستانێ بوو ب رێبەرییا بارزانیێ نەمر. بۆ ئێكەمین جار حوكمەتا ئیراقێ دانپێدان ب پشكەك ژ مافێن گەلێ كورد كر و ئەو دەلیڤەیە پەیدابوو گەلێ كوردستانێ بشێت كاری ل سەر خوەبڕێڤەبرنێ و ب هێزكرنا زمان و كەلتوور و دابینكرنا ئارامیێ بكەت. ئەو رێككەفتنە بەرهەمێ خەباتا پێشمەرگەی و كادرێن حزبی و هەموو تەخ و چینێن كوردستانێ ل شۆڕەشا ئیلۆنێ بوو و هەلگرا وانەیەكا ستراتیژی و گرنگ بوو بۆ قۆناغێن داهاتی ژ خەباتا بزاڤا رزگاریخوازا كوردستانێ و بۆ ئەگەرێ ب هێزتربوونا دۆزا رەوا یا گەلێ كوردستانێ.
ل سالڤەگەڕا 55 یا رێككەفتنا 11 ئادارێ هزاران سلاڤان بۆ گیانێ پاقژێ شەهیدێن شۆڕەشا ئیلۆنێ و هەموو شۆڕەشێن كوردستانێ دهنێرین و مە رێز بۆ هەموو پێشمەرگە خەباتكەرێن شۆرەشا ئێلۆنێ یا هەی كو ب پێداگیری و ورەیێن پیلایی دەستكەفتێن مەزن بۆ گەلێ خوە مسۆگەركری.
