رێيا گه‌ليێ عه‌لى به‌گ دووباره هاته ڤه‌كرن
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا به‌ره‌ڤانيا باژێرى ل سوران راگه‌هاند كو نها رێيا گه‌ليێ عه‌لى به‌گ ب روويێ شوفێران دا هاتيه ڤه‌كرن و دا زانين كو مه‌ترسيا له‌هيه‌كا دژى د رێ دايه.
عه‌ميد عيماد رێكان، رێڤه‌به‌رێ بنگه‌هێ به‌ره‌ڤانيا باژێرى ل سوران كو هه‌ر چار قه‌زايێن ده‌وروبه‌ر ب خوه ڤه دگريت، د داخۆيانيه‌كێ دا بۆ ئه‌ڤرۆ نيوز گۆت: “ئه‌ڤرۆ سپێده‌هيا رۆژا سێشه‌مبى رێيا گه‌ليێ عه‌لى به‌نگ هه‌تا راده‌كێ باش هاتيه ڤه‌كرن و ب چه‌ند ده‌مژمێرێن بهێت دێ رێ ب ته‌مامى ب روويێ شوفێران دا هێته ڤه‌كرن”.
زێده‌تر گۆت: “ب گۆره‌ى پێشبينيێن كه‌شناسيێ دهێته پێشبينكرن كو پێله‌كا دى يا باران بارينێ ڤه‌گريت و له‌هى رابن، ژ به‌ر هندێ ژى تيمێن وان د ئاماده‌باشيێ دانه بۆ هه‌ر روودانه‌كا نه‌چاڤه‌رێكرى”.
رێڤه‌به‌رێ بنگه‌هێ به‌ره‌ڤانيا باژێرى ل سوران هيڤى ژى ژ وه‌لاتيان خواست كو هه‌كه گه‌له‌ك يا پێدڤى نه‌بيت هاتنوچوونێ د وێ رێ دا نه‌كه‌ن و رێيێن پێگوهۆڕ بكاربينن.
ده‌رباره‌ى ده‌رباز بوون ژ ڤان ره‌نگه مه‌ترسيان و ڤه‌ديتنا چاره‌كا بنبڕ، عه‌ميد عيمان رێكان گۆت: “چاره‌كرنا ڤێ رێ ب ره‌نگه‌كێ هه‌رده‌مى پێدڤى ب پرۆژێن گه‌له‌ك مه‌زن هه‌يه وه‌كو چێكرنا رێيه‌كا ئۆڤه‌ر پاس كو ژ ڤان رێيان بلندتر بيت و ئه‌ڤه ژى پێدڤى ب كاره‌كێ زۆره و د نها دا ناهێته كرن”.
