رێژا نەخواندەواریێ ل ھەرێمێ چه‌نده؟
ئەڤرۆ نیوز:
رۆژا نەھێلانا نەخواندەواریێ ل جیھانێ کو د کەڤیتە ٨/٩ ھەموو سالان ل سەرانسەری جیھانێ دھێتە ساخکرن، بۆ ڤێ مەرەمێ ژی وەزارەتا پەروەردێ ل حوکمەتا ھەرێما کوردستانێ د بەیانامەکێ دا ئاشکرا کر کو دڤێ رۆژێ دا چەندین چالاکیێن جۆراوجۆر و بەرنامەکێ ھشیاریێ دێ ئەنجام دەن.
وەزارەتا پەروەردێ ل حوکمەتا ھەرێما کوردستانێ د بەیاناما خوە دا دیار کریە کو وەزارەتا پەروەردێ یا بەردەوامە د ھەوا نەھێلانا نەخواندەواریێ دا ل ھەموو باژێر و باژارۆک و گوندێن کوردستانێ بۆ وێ چەندێ دەرفەت بھێتە دان ھەموو تاکێن د ناڤ جڤاکی دا بخوینن و رێژا نەخواندەواریێ ل ھەرێما کوردستانێ کێم ببیت.
وەزارەتا ناڤبری ئاماژە دایە وێ چەندێ کو ژ سالا ٢٠٠٠ ھەتا ٢٠١٥، د ڤی دەمی دا ١٠ ھزار و ٦٥٤ بنگەھێن نەھێلانا نەخواندەواریێ یێن ھاتینە ڤەکرن و ب ڤەکرنا ڤان بنگەھان ٣٩١ ھزار و ٢٨٧ کەس ژ نەخواندەواریێ رزگار بووینە و بووینە خواندەوار و ب ڤێ چەندێ ئەو شیان رێژا نەخواندەواریێ ژ ٣٤% بۆ ١٥% کێم بکەن
وەزارەتا ناڤبری ئاشکرا کر کو ژ سالا ٢٠٠٥ٍ و ھەتا ئەڤرۆ وەزارەتا پەروەردێ یا بەردەوامە د ڤەکرنا قوتابخانێن خواندنا بلەز دا ل ھەرێما کوردستانێ و ئەڤ پرۆژە ژی وان زارۆ و سنێلەیێن ژیێ وان د ناڤبەرا (٩ ھەتا٢٢) سالیێ ئەوێن ژ خواندنێ د بێ بەھر ب خوەڤە دگرێت.
