رێژا پێسبوونا ئاڤا به‌سرا گه‌هشته ئاسته‌كێ مه‌ترسيدار
ئه‌ڤرۆنيوز:
ژێده‌ره‌كى ژ پارێزگه‌ها به‌سرا بۆ ئه‌ڤرۆنيوز دياركر كو ل دووڤ وان پشكنينێن رێڤه‌به‌ريا ساخله‌مى وژينگه‌ها به‌سرا و دووڤچوونێن رۆژنامه‌ڤانى ئه‌وێن ل سه‌ر ئاڤا به‌سرا هاتينه ئه‌نجامدان، دياربوويه كو رێژا پيسبوونا ئاڤێ ل به‌سرا گه‌هشتيه ئاسته‌كێ مه‌ترسيدار.
عه‌لى ئه‌لحوسه‌ينى، رۆژنامه‌ڤان ژ به‌سرا بۆ ئه‌ڤرۆنيوز گۆت” ل دووڤ ئامارێن ل به‌ر ده‌ستێ مه كو ژ رێڤه‌به‌ريا ساخله‌ميێ وژينگه‌هێ ل به‌سرا ب ده‌ست مه كه‌فتين ووان دووڤچوونێن رۆژنامه‌ڤانى يێن مه ئه‌نجامداين دياربوويه كو رێژا پيسبوونا ئاڤا به‌سرا گه‌هشتيه 100% ورێژا به‌كتريا ژى دنڤ ئاڤێ دا گه‌هشتيه 50%”.
ناڤبرى دياركر” ل چه‌ندين رۆژێن بۆرى ب سه‌دان كه‌س ژئه‌گه‌رێ پيسبوونا ئاڤا ڤه‌خورانێ ل به‌سرا، دهينه ڤه‌گوهاستن بۆ نه‌خوه‌شخانه‌يان ول دووڤ ئامارێن ب ده‌ستمه كه‌فتين نێزيكى پێنج هزار كه‌س ژى يێن ژه‌هراوى بووين وتووشى زكچوونێ بووين”.
دياركر ژى” گه‌له‌ك نه‌خوه‌شخانه‌يێن به‌سرا تژى بووينه ژ نه‌خوه‌شان وهه‌تا ل گه‌له‌ك نه‌خوه‌شخانه‌يان ته‌ختێن زێده دانان وگه‌له‌ك نه‌خوه‌ش ل سه‌ر ئه‌ردى دهاتنه نڤاندن”
وى رۆژنامه‌ڤانى گۆت ژى” ئه‌ڤرۆ شانده‌كێ حوكمه‌تا عيراقى ب سه‌رۆكاتيا وه‌زيرا ساخله‌ميێ (عه‌ديله حمود) گه‌هشتيه به‌سرا وچه‌ندين كۆمبوون ئه‌نجامداينه ل دۆر پرسا پيسبوونا ئاڤا به‌سرا”.
