رێژه‌كا باشا به‌فرێ ل ده‌ڤه‌را ئامێدیێ بارییه
په‌یامنێران، زنار و مه‌حمود:
پێله‌كا دی یا سه‌رمایێ ده‌ڤه‌را ئامێدیێ و به‌رواری بالا ڤه‌گرت و د ئه‌نجامدا 20 مه‌نتیمه‌ترێن به‌فرێ ل سه‌نته‌رێ ده‌ڤه‌رداریا ئامێدیێ و 27 سه‌نتیمه‌تر ژی ل ناوچه‌داریا كانی ماسێ بارینه و سه‌قایێ ده‌ڤه‌رێ گه‌له‌ك ساربوویه و ده‌ڤه‌ردارێ ئامێدیێ ژی دبێژیت: رێكێن سه‌ره‌كی یێن هاتنوچوونێ ژی به‌رده‌وام ژ به‌فرێ دهێنه ڕامالین.
هاشم یه‌حیا، به‌رپرسێ پشكا سه‌قاناسیێ ل ئامێدیێ بۆ رۆژناما ئه‌ڤرۆ دیار كر، ل شه‌ڤا 15 ل سه‌ر 16/1/2022 ل سه‌نته‌رێ ده‌ڤه‌رداریا ئامێدیێ 20 سه‌نتیمه‌ترێن به‌فرێ بارینه، ل كانی ماسێ 27 سه‌نتیمه‌تر، ل سه‌رسنكێ 14 سه‌نتیمه‌تر، ل دێره‌لۆكێ 4 سه‌نتیمه‌تر ، ل بامه‌رنێ 10 سه‌نتیمه‌تر و ل چه‌مانكێ ژی 16 سه‌نتیمه‌ترێن به‌فرێ بارینه و گۆت: “رێژا بارانبارینێ ئه‌ڤ ساله ل ده‌ڤه‌را ئامێدیێ گه‌هشتیه دۆرێن ٢٠٠ ملیمان”.
وارشین سه‌لمان، ده‌ڤه‌ردارێ ئامێدیێ بۆ رۆژناما ئه‌ڤرۆ دیار كر، تیمێن رامالینا به‌فرێ هه‌ر دوهی سپێدێ ده‌ست ب پاقژكرنا رێكان كریه و د زووترین ده‌م دا هه‌موو جادێن سه‌ره‌كی هاتنه ڤه‌كرن و گۆت: “هاتنوچوون د ناڤبه‌را سه‌نته‌رێ ده‌ڤه‌رداریێ و هه‌موو ناوچه‌داری و كۆمه‌لگه‌هان دا یا ئاسایی بوویه، هنده‌ك رێكێن ناڤخوه‌یی مابوون، ئه‌و ژی ژ به‌فرێ دێ هێنه رامالین و ڤه‌كرن”.
مسته‌فا ئه‌حمه‌د، ژ هۆبا چاندنا كانی ماسێ بۆ رۆژناما ئه‌ڤرۆ دیار كر، ژ ئه‌نجامێ ڤێ پێلا سه‌رما و به‌فرێ سه‌قایێ ده‌ڤه‌رێ گه‌له‌ك ساربوویه و 27 سه‌نتیمه‌ترێن به‌فرێ ل سه‌نته‌رێ ناوچه‌داریا كانی ماسێ بارینه و گۆت: “ئه‌ڤ ساله هه‌تا نوكه 257 ملیمێن بارانێ ل ناوچه‌داریا كانی ماسێ بارینه و پار هه‌تا ڤی ده‌می 206 ملیمێن بارانێ باریبوون، دیسا هه‌تا نوكه 55 سه‌نتیمه‌ترێن به‌فرێ ل سه‌نته‌رێ ناحیا كانی ماسێ بارینه”.
وه‌جیهـ سه‌عید، رێڤه‌به‌رێ په‌روه‌ردا ئامێدیێ بۆ رۆژناما ئه‌ڤرۆ دیار كر، وان ده‌سهه‌لات دایه رێڤه‌به‌رێن قوتابخانان هه‌ر ده‌ڤه‌ره‌كا ژ به‌ر به‌فرێ هاتنوچوون نه‌بیت، د شیاندایه تاقیرنان ڤه‌هێلن بۆ ده‌مژمێرێن دووڤ دا یان ژی رۆژا پاشتر و گۆت: “ژ به‌ر بارینا به‌فرێ هه‌موو باخچێن ساڤایان ل سنوورێ په‌روه‌ردا ئامێدیێ دوهی ده‌وام نه‌هاتیه كرن”.
