رێژەیەکا زۆرا دەرمانێ ژ ناڤبرنا کولیان گەھشتە ڤێ دەڤەرێ
ئەڤرۆ نیوز ، نەوزاد ھلۆری:
پشتی کو ئەڤرۆ نیوز ئاریشەیا جوتیار و رەزڤانێن دەڤەرا ئامێدیێ ب تایبەتی بەرێ گارێ بەرچاڤ کری کو رێژەیەکا زۆرا کولیان ب سەر دەرامەت و چاندن و رەز و بیستانێن وان دا گرتیە و ھەموو پوچکریە ، ئەڤرۆ رۆژا چوارشەمبی رێڤەبەریا چاندنا ئامێدیێ دیارکر کو ئەوان رێژەیەکا پێدڤی یا دەرمانێ ژەھراوی بو ژناڤبرنا کولیان بەرھەڤکریە و دخوازین کو جوتیارێن دەڤەرێ ب زوترین دەم سەرەدانا مە بکەن بۆ وەرگرتنا دەرمانی.
دڤی واریدا “ئەندازیا ھەکار ئامێدی ” تایبەت بۆ ئەڤرۆ نیوز گۆت: (بەلاڤبوونا جورەکێ کولی ل دەڤەرا ئامێدیێ ب گشتی و بەرێ گارێ ب تایبەت بویە سەدەم کو رێژەیەکا زۆرا دەرامەت و چاندن و رەز و بیستانێن جوتیار و وەلاتیان پوچ ببیت و زیانەکا زۆر ژی ب جوتیاران بکەڤیت ، داکو زێدەتر کارتێکرن لسەر چاندنا جوتیاران و رەز و بیستانێن وەلاتیان نەھێتەکرن ، لیژنەیەکا تایبەتمەند ژلایێ رێڤەبەریا گشتی یا چاندنێ ل دھۆکێڤە ژ نێزیک سەرەدانا رەز و بیستان و چاندنا دەڤەرێ کر و دیاربو کو ئەڤ جورێ کولی مەترسیە و پێدڤی یە بھێتە ژناڤبرن ، ژبەرڤێ مە نھا رێژەیا پێدڤی یا جورەکێ دەرمانێ ژەھراوی بو ژناڤبرنا ئەوان کولیان دابینکریە بو جوتیار ، و داخوازێ ژ جوتیاران دکەین کو ب زوترین دەم سەەردانا رێڤەبەریا مە بکەن بۆ وەرگرتنا ئەوی جورە دەرمانی)
زێدەتر گۆت: ( نھا ٢٥٠ لیترێن دەرمانێ ژەھراوی بو ژناڤبرنا کولینان بەرھەڤن کو تێرا ھزار و ٥٠٠ دونەمێن چاندنێ ھەیە ، ئانکو ھەر لیترەک دێ بو شەش دونەمێن زەڤیێن چاندنێ و دەرمامەتێ کولی لێ ھەیی ھێتە رەشاندن ب رێیا موزاخان)
