رێڤه‌به‌رێ پۆليسێن كه‌ركووك و 23 ئه‌فسه‌ر و كارمه‌ندێن پۆليسان هاتنه ده‌سته‌سه‌ركرن
ئه‌ڤرۆ نيوز:
ژێده‌ره‌كێ ئه‌منى ئه‌ڤرۆ رۆژا ئێكشه‌مبى راگه‌هاند كو نڤيسينگه‌ها سه‌رپه‌رشتيارێ گشتى ل وه‌زاره‌تا ناڤخۆ يا عيراقێ، رێڤه‌به‌رێ پۆليسێن هاتنوچوونا كه‌ركووك و 23 ئه‌فسه‌ر و كارمه‌ندێن ژ پۆليسێن كه‌ركووك ده‌سته‌سه‌ركرن.
ئه‌وى ژێده‌رى بۆ سومه‌ريه نيوز گۆت: “نڤيسينگه‌ها سه‌رپه‌رشتيارێ گشتى ل وه‌زاره‌تا ناڤخۆ يا عيراقێ، عه‌قيد شێرزاد ئه‌حمه‌د محه‌مه‌د، رێڤه‌به‌رێ پۆليسێن هاتنوچوونا كه‌ركووك ب تاوانا تۆماركرنا ترۆمبێللان ب ره‌نگه‌كێ نه‌يێ قانوونى ده‌سته‌سه‌ركريه”.
ئه‌وى ژێده‌رى ئاماژه ب وێ چه‌ندێ ژى كريه كو نڤيسينگه‌ها سه‌رپه‌رشتيارێ گشتى، رێڤه‌به‌رێ پۆليسێن ره‌حيماوا و ئه‌فسه‌ره‌كێ نه‌هێلانا تاوانان ل بنگه‌هى و دو ئه‌فسه‌رێن دى و 19 كارمه‌ندێن دى يێن پۆليسان ده‌سته‌سه‌ركرن.
ده‌سته‌سه‌ركرنا رێڤه‌به‌رێ و ئه‌فسه‌ر و كارمه‌ندێن بنگه‌هێ پۆليسێن ره‌حيماوا، پشتى وێ چه‌ندێ دهێت كو دوهى راگرتيه‌كێ تۆمه‌تبار ب كوشتن و دزيكرنێ ل باژێرێ كه‌ركووك ژ وى بنگه‌هى ره‌ڤى يه.
