رێڤه‌به‌رێ DUHOK TV هاته گوهۆڕين
ئەڤرۆ:
جێگرێ رێڤەبەرێ تەلڤزیونا دھۆک یێ بەرێ دیار کر پشتی کو بریار ھاتی کو رێڤەبەرێ تلەڤزیۆنێ ببیتە جێگرێ بەرپرسێ دەزگەھێ خانی، بریار ھاتە دان کو ئەو پۆستێ رێڤەبەراتیا تەلڤزیۆنا دھۆک وەربگریت.
عەدنان یوسف رێڤەبەرێ نوو یێ تلەڤزیۆنا دھۆک بۆ ئەڤرۆ دیار کر پلان بۆ ڤێ چەندێ ھاتبوو دانان و چاڤەرێی بڕیارا نڤیسینگەھا ناڤەندیا راگەھاندنێ بوون و گۆت “رۆژا ٢٠-١-٢٠١٥ بریار گەھشت و دوھی من ب فەرمی دەست بکارێ خوە کر وەکو رێڤەبەرێ تلەڤزیۆنا دھۆک”.
رێڤەبەرێ تلەڤزیۆنا دھۆک خویا ژی کر کو خۆشناڤ جەمیل وەکو جێگرێ بەرپرسێ دەزگەھێ خانی ھاتیە دانان و گۆت “پێدڤیە ئەم دەستخۆشیێ ل خۆشناڤ جەمیل بکەین، چونکی چەندین سالە خزمەتا تلەڤزیۆنێ دکەت و خوە پێڤە ماندی کریە، ل ھەمان دەمی پیرۆزیێ لێ دکەم و ھیڤیدارم د کارێ خوەیێ نوو دا یێ سەرکەفتی بیت”.
ھەروەسا عەدنان یوسف دیار کر کو تلەڤزیۆنا دھۆک تلەڤزیۆنا دایکە و ھەر کەسەکی بیرھاتن ل گەل ھەنە و گۆت “شانازیە کو تلەڤزیۆنا دھۆک مینا پەیمانگەھا بەرھەڤکرنا کادران بوویە کو نھا ل کەنالێن کوردستانێ و جیھانێ کار دکەن، لەورا پێدڤیە ئەم ھەمی پێکڤە کار بۆ پێشخستنا ڤێ تلەڤزیۆنا دایک بکەین”.
دەربارەی ئاسمانیبوونا دھۆک تیڤی عەدنان یوسف دیار کر کو بابەتێ ئاسمانیبوونێ یێ کەڤنە، لێ دھۆک تیڤی یا ژ ئالیێ دارایی ڤە یا پشتگوھخستیە و گۆت “مە کادرێ ژ ھەژی یێ ھەی و ھەردەمێ پشتەڤانی بۆ مە بھێتە کرن، ئەم دشێین د چەند ھەیڤان دا خوە بۆ بەرھەڤ بکەین و دھۆک تیڤی بکەینە ئاسمانی”.
