رێڤينگ هرۆرى: پێدڤيه روونشتنا په‌رله‌مانى ژ 6ى هه‌يڤا بهێت نه‌بۆريت
ئه‌ڤرۆ نيوز، نيوار محه‌مه‌د سه‌ليم:
ب گۆره‌يى جڤاتا دادوه‌رى يا گشتى ل هه‌رێما كوردستانێ پێدڤيه هه‌تا 6ى چريا دويێ 2018 خولا پێنجێ يا په‌رله‌مانێ كوردستانێ سووندا قانوونى بخۆت و ب مه‌زنترين په‌رله‌مانتارێ ڤێ خولێ ژى سه‌رۆكاتيا روونشتنێ بكه‌ت.
هه‌ر ديسا ده‌نگويه‌ك هه‌يه كو ل رۆژا سێشه‌مبى روونشتنا جڤاتا نوونه‌رێن عيراقێ ژى بۆ باوه‌رى دان ب هه‌شت وه‌زيرێن مايى يێن كابينا عادل عه‌بدولمه‌هدى ژى برێڤه بچيت.
ل دۆر ڤى بابه‌تى رێڤينگ هرۆرى مه‌زنترين په‌رله‌مانتارێ ڤێ خولێ كو ل سه‌ر فراكسيۆنا پارتى ديموكراتى كوردستانه و دێ سه‌رۆكاتيا په‌رله‌مانێ كوردستانێ د روونشتنا ئێكێ دا كه‌ت بۆ ئه‌ڤرۆ نيوز گۆت: “هه‌ر چه‌نده سه‌رۆكاتيا دادوه‌ريا گشتى ديار ژڤانێ روونشتنا په‌رله‌مانێ كوردستانێ نه‌كريه، به‌لێ دڤێت ژ 6ى چريا دويێ نه‌بۆريت، چونكو دێ ڤالاتيا قانوونى په‌يدا بيت”
سه‌رۆكێ روونشتنا ئێكێ يا په‌رله‌مانێ كوردستانێ زێده‌تر گۆت: “روونشتنا په‌رله‌مانێ كوردستانێ چو په‌يوه‌ندى ب روونشتنا جڤاتا نوونه‌رێن عيراقێ ڤه نينه”.
رێڤينگ هرۆرى دا زانين ژى كو په‌رله‌مان دێ روونيت خوه هه‌كه لايه‌نێن سياسى نه‌گه‌هشتنه رێكه‌فتنێ ژى دێ هه‌ر رێوره‌سمێن سووند خوارنێ هێنه گێران و گۆت: “پاشان دێ روونشتنا په‌رله‌مانى مينيته ڤه‌كرى هه‌تا لايه‌نێن سياسى بگه‌هنه رێكه‌فتنێ”.
نه‌ڤه‌شارت ژى كو چو ده‌مێن دياركرى نينن كا دڤێت لايه‌نێن سياسى د چه‌ند ماوه‌يى دا بگه‌هنه رێكه‌فتنێ، به‌لێ دوور نه‌ديت ژى كو لايه‌نێن سياسى د ده‌مه‌كێ نێزيك دا بگه‌هنه رێكه‌فتنێ، پشتى ده‌ست ب دانوستاندنان دكه‌ن.
پێشتر ئالا ته‌له‌بانى د داخۆيانيه‌كا رۆژنامه‌ڤانى دا راگه‌هاند بوو كو ئێكه‌تى پۆستێ سه‌رۆكێ په‌رله‌مانى ب مافێ خوه دزانيت وه‌كو ده‌ستكه‌فته‌كێ هه‌لبژارتنان و بۆ ڤێ مه‌ره‌مێ ژى ئالا ب خوه به‌ربژارا وان يا ئێكانه‌يه بۆ ڤى پۆستى.
ل دۆر ڤێ پرسێ رێڤينگ هرۆرى گۆت: “هه‌كه ئێكه‌تيێ به‌ربژارێ خوه دياركه‌ت پارتى چو كێشه ل سه‌ر نينن، چونكو ژ نوو دێ دانوستاندن هێنه كرن و هه‌كه بۆ به‌هرا وان ل وى ده‌مى ئه‌و كه‌سا وان ده‌ستنيشان كرى دێ ئه‌و بيت”.
هرۆرى دا زانين ژى كو پارتى هه‌تا نوكه پێداگرى ل سه‌ر چو تشتان نه‌كريه و هێلا سۆر ژى ل سه‌ر چو كه‌سان نينه.
ل دووماهيێ ژى خۆيا كر كو هه‌ر ده‌ما دانوستاندن هاتنه كرن پارتى به‌ربژار بۆ هه‌موو پۆستان يێن هه‌ين و وه‌كو لايه‌نێن دى كوتله د ناڤ دا د زال نينن خودان ئێك بڕياره و گۆت: “هێشتا به‌ربژار ژى بۆ چو پۆستێن په‌رله‌مانى و سه‌رۆكاتيا وه‌زيران ديار نه‌كرينه”.
