رێڤەبەرێ سەنتەرێ راگەهاندنا ئیراقی ل واشنتۆن: حوكمەتا بەغدا پێگیری سۆزێن خوە نەبوویە بەرانبەر ئەمریكا
رێڤەبەرێ سەنتەرێ راگەهاندنا ئیراقی ل واشنتون، ئاماژە ب ئەوێ چەندێ كر: حوكمەتا محەمەد شیاع سۆدانی پێگیری سۆزێن خوە نەبوویە بەرانبەر ئەمریكا.
نزار حەیدەر، رێڤەبەرێ سەنتەرێ راگەهاندنا ئیراقی ل واشنتون د داخۆیانییەكا رۆژنامەڤانیدا گۆت » كۆماری و دیموكراتیخواز ل گۆنگرێسێ ئەمریكی د هەڤڕانە ل سەر ئەوێ سیاسەتا گشتی یا كو ئیدارەیا ئەمریكا دخوازیت ل ئیراقێ بجهبینیت.
نزار حەیدەر دیاركر ژی» هەكە ئیدارەیا نوكە یا ئەمریكا بەردەوام ببیت ل سەر دەستهەلاتێ ل كۆچكا سپی، ئامرازێن بجهئینانا سیاسەتا خوە ل ئیراقێ دێ توندتر لێكەت و سیاسەتەكا ب هێزتر هەمبەر كرن ل گەل یا بەری نوكە دێ هەبیت» .
ناڤبری ئاماژەكر» محەمەد شیاع سۆدانی و حوكمەتا وی هەتا نوكە نەشیاینە پێگیری گەلەك ژ ئەوان سۆزا ببن یێن كو ب ئەمریكا داین، بەری هەموویان ژی پاراستنا دەزگەهێن بیانی ب تایبەت ئەمریكییان».
رێڤەبەرێ سەنتەرێ راگەهاندنا ئیراقی ل واشنتون دوپاتی ل ئەوێ چەندێ كر» ئیراقێ ئەو گرنگییا جاران نەمایە كو كارێ بەراهیێ ئەمریكا بیت، هەكە ئیدارەیا ئەمریكا بهێتە گوهۆڕین ژی ئیراق هەر نابیتە كارێ بەراهیێ یێ ئەمریكا».
ل دۆر ڤەكێشانا هێزێن ئەمریكی ژ ئیراقێ، نزار حەیدەر دبێژیت» هیچ كەسەك هەتا حوكمەتا ئیراقی ژی باس ل ڤەكێشانا هێزێن ئەمریكی ژ ئیراقێ ناكەت، بەلكو داخواز دهێتە كرن شێواز و سروشتێ مانا هێزێن ئەمریكی ل ئیراقێ بهێتە گوهۆڕین» .
