رێڤەبەرێ نەخۆشخانێ: ب ڤی رەنگی نەشێین ئێدی تیشکان ل نەخۆشخانا ئازادی بگرین
ئەڤرۆ نیوز:
رێڤەبەرێ نەخۆشخانێ ئازادی یا فێرکرنێ ل دھۆکێ ئاشکرا کر کو بەردەوام رێژا کەرستا و ئامیرێن پێدڤی بۆ تیشک و نیشتەرگەریان ل نەخۆشخانا ئازادی بەر ب کێمبوونێ دچن و گۆت: “ھەکە ب ڤی رەنگی بیت ل دەمەکێ نێزیک پشکا تیشکێ دێ ھێتە داخستن”.
د. سەباح ئەحمەد، رێڤەبەرێ نەخۆشخانێ ئازادی یا فێرکرنێ ل دھۆکێ دیار کر کو ھەیڤانە کەرەستە و پێدڤیێن پشکا تیشکێ و نیشتەرگەریان ژ لایێ وەزارەتا ساخلەمیا ھەرێمێ و بەغدا و چەندین رێکخراوان ڤە بۆ نەخۆشخانا ئازادی یا فێرکرنێ ل دھۆکێ دھێنە دابینکرن، بەلێ ئەو کەرەستە نەدئاستێ پێدڤی دانە و ھژمارا داخوازکریان گەلەک ژ بەر ڤێ چەندێ دوور نینە ل دەمەکێ نێزیک پشکا تیشکێ ل نەخۆشخانا ئازادی ژ ئەگەرێ کێمبوونا کەرەستان و ئامیرێن نووژەنکرنێ ب تمامی بھێتە گرتن و بۆ دواڕۆژ گۆت: “دو ئامیرێن میفراسێ یێن ل نەخۆشخانا ئازادی ھەین، بەلێ ئێک ژوان یێ ژ کارکەفتی و یێ دی ژی بۆ دەمێ 20 رۆژانە ل ژێر نووژەنکرنێ یە و ھێشتا کار ل سەر ب دووماھی نەھاتیە ژ بەر ڤێ چەندێ سرا تیشکێ درێژبوویە”.
ناڤھاتی خویا کر کو ھندەک جاران تنێ تیشکێن گرنگ دھێنە گرتن و تیشکێن ئاسایی و نەپێدڤی دھێنە پاشخستن، چونکی ھندەک جاران پێدڤیێن تیشکێ نینن یان ئامیرە یێن ژ کارکەفتینە و گۆت: “ل ھۆلێن نیشتەرگەریان ژی ئاریشێن کەرستە و ئامیرێن نیشتەرگەریان ھەنە، ھەر چەندە ھەتا نوکە نیشتەرگەری بەردەوام دھێنە ئەنجامدان، بەلێ ھەکە رەوش ھەر ب ڤی رەنگی یا بەردەوام بیت دوور نابینم ھندەک نیشتەرگەری ل نەخۆشخانا ئازادی نەھێنە ئەنجامدان”.
ل دووماھیێ رێڤەبەرێ نەخۆشخانێ ئازادی یا فێرکرنێ ل دھۆکێ ئاشکرا کر کو وان چەندین جاران ب نڤیسارێن فەرمی داخواز ژ رێڤەبەریا گشتی یا ساخلەمیا پارێزگەھا دھۆکێ و جھێن پەیوەندیدار کریە کو پێدڤیێن ھۆلێن تیشک و نیشتەرگەریان بەردەوام بۆ نەخۆشخانا ئازادی دابین بکەن، چونکی بارگرانیەک مەزن یا ل سەر ڤێ نەخۆشخانێ، بەلێ ھەتا نوکە ئەڤ ئاریشە نەھاتیە چارەسەرکرن.
