رێڤەبەرێ گشتیێ پۆلیسێن دارستانێ: من پارە نینن سەرەدانا دھۆکێ بکەم
ئه‌ڤرۆ نيوز:
رێڤەبەرێ گشتیێ پۆلیسێن دارستان و ژینگەھێ دیار کر، ژ بەر نەبوونا میزانیەکا پێدڤی نەشێن سەرەدانا ھەموو دەڤەرەکێ بکەن و دبێژیت: پۆلیسێن دارستان و ژینگەھێ شیانە کەسێن بەرپرس و چەکدار سزا بدەن.
لیوا مستەفا باویل ئاغا، رێڤەبەرێ گشتیێ پۆلیسێن پاراستنا داراستان و ژینگەھێ بۆ رۆژناما ئەڤرۆ گۆت: “بڕیاربوو پۆلیسێن ژینگەھێ و پێشمەرگێن ژینگەھێ بھێنە تێکەلکرن ھەتا ئێک ھێز ھەبیت و بشێت پتر دارستان و ژینگەھێ ب پارێزیت، بەلێ ھەتا نوکە ئەڤ بڕیار نەھاتیە بجھئینان، ئێک ژ ئاریشێن مە نوکە نەبوونا میزانی و کەلوپەلێن پێدڤیە بۆ پۆلیسێن ژینگەھێ، میزانیا مە زێدە یا کێمە و بەھرا ھەموو تشتان ناکەت، ژ بەر بێ پارەیێ ئەز وەکو رێڤەبەرێ گشتی نەشێم سەرەدانا پارێزگەھا دھۆکێ بکەم”.
لیوا مستەفا باویل ئاغای خویا ژی کر، پتریا تڕۆمبێلێن وان ل ئاکرێ و ھەولێرێ ب شێوێ گرێبەستن، ھەر جارەکا گرێبەست ب دووماھی دھێت ب سەد دەرد و بەلا ھەتا وەزارەتا دارایی ل دۆر نووکرنا گرێبەستان رازی دبیت و گۆت: “ھەکە پۆلیسێن پاراستنا دارستن و ژینگەھێ تڕۆمبێل نەبیت؛ دێ چاوا شێت کارێ خوە ئەنجام دەت، ژبلی دارستان و ژینگەھێ نوکە ئەرکێ مە گرانتر لێ ھاتیە، چونکو پاراستنا بیرێن پەتڕۆلێ و زێدەگاڤیێن سەر ئەردی ژی ھەر پۆلیسێن مە دکەن”.