رێڤەبەرەک رەت دکەت سەرا سەختەکاریێ ژ پۆستێ وی ھاتبیتە لادان
ئەڤرۆ نیوز:
گۆتگۆتکا وێ چەندێ ھاتبوو بەلاڤکرن کو رێڤەبەرێ بەرێ یێ رێڤەبەریا رەگەزنامە و کاروباێن شارستانی ل قەزا بەردەرەش ژ ئەگەرێ دروستکرنا ناسنامەکا سەختە ژ پۆستێ رێڤەبەریێ ھاتیە لادان، ئەو رێڤەبەرە ژی وێ گۆتگۆتکێ رەت دکەت کو ژ ئەگەرێ سەختەکرنێ ئەو ھاتبیتە لادان.
نەقیب نەوزاد قاسم کاوانی، رێڤەبەرێ بەرێ یێ فەرمانگەھا رەگەزنامە و کاروباێن شارستانی ل قەزا بەردەرەش بۆ رۆژناما ئەڤرۆ گۆت: “من شەش سالان خزمەتا قەزا بەردەرەش کریە و ئەز تحەدایێ دکەم کو من بەرتیل ژ کەسەکی وەرگرتبیت، بەلکو ھندەک کەسان گۆتگۆتکەک ل سەر من بەلاڤکریە کو من ناسنامەکا سەختە دروستکریە و ژ بەر ھندێ ئەز ل رێڤەبەریا ل رەگەزنامە و کاروباێن شارستانی ل قەزا بەردەرەش ھاتیمە لادان و بۆ دھۆکێ ھاتیمە ڤەگوھاستن، ئەڤ چەندە یا دوورە دیرە ژ راستیێ و نھا ئەو جھێ ئەز لێ دەوامێ دکەم بلندترە ژ وی پوستێ بەری نوکە من ھەی”.
عەقید ئیبراھیم عەگید، رێڤەبەرێ گشتی یێ یارەگەزنامە و کاروبارێن شارستانی ل پارێزگەھا دھۆکێ بۆ رۆژناما ئەڤرۆ خویا کر، ڤەگوھاستنا نەقیب نەوزاد قاسم نە ژ ئەگەرێ وێ چەندێ یە کو کارەکێ نەقانوونی کربیت و گۆت: “مە وەکو رێڤەبەریا گشتی کارەکێ باشتر یێ پێ ھەی و نھا یێ بوویە جێگرێ رێڤەبەریا رەگەزنامە و کاروبارێن شارستانی ل پارێزگەھا دھۆکێ، سیستەمێ مە ئەوە، ھەر چەند سالان ئەم گورانکاریان دکەین و کەسێن باش دبەینە جھێن باشتر و نەوزاد ژی ئێک ژ وان ئەفسەرایە کو مە ڤەگوھاستیە جھەکێ بلندتر”.
