رێکخراوەکا یابانی دێ ھژمارەکا نشتەگەریێن جوانکاریێ ل دھۆکێ ئەنجام دەت
ئه‌ڤرۆ نيوز:
تایبەتمەندەکێ نشتەگەریێن جوانکاریێ ل نەخۆشخانا سۆتن و جوانکاریێ ل پارێزگەھا دھۆکێ دیار کر کو رێکخراوەکا یابانی گەھشتیە پارێزگەھا دھۆکێ ل نەخۆشخانا سۆتن و جوانکاریێ دێ نشتەگەریان بێ بەرامبەر ب پشتەڤانیا ساخلەمیا پارێزگەھا دھۆکێ بۆ وەلاتیان ئەنجام دەت.
د. سالح ئەحمەد، تایبەتمەندێ نشتەگەریێن جوانکاریێ ل نەخۆشخانا سۆتن و جوانکاریێ ل پارێزگەھا دھۆکێ دیار کر کو ئەڤە سالا دویێ یە ئەڤ رێکخراوا یابانی دھێنە دھۆکێ ل سالا بۆری دا 24 نشتەگەریێن زکماکی یێن جوانکاریێ بۆ وەلاتیان ئەنجامدان وەکو نشتەگەریێن دەڤ و لێڤا و سۆتن و ئەو کەسێن گوھێن وان نە دروست و دەستێن وان پێکڤە و گۆت: “ئەڤ سالە ژی ڤێ رێکخراوێ 110 نەخۆش دیتینە ژ وان ژی 30 نەخۆش ھاتینە دەست نیشانکرن دێ نشتەگەری بۆ وان ھێنە ئەنجامدان”.
ناڤھاتی ئاماژە دا وێ چەندێ کو رێکخراوا ئای ھو ئەڤ سالە ژی ل نەخۆشخانا سۆتن و جوانکاریێ ل پارێزگەھا دھۆکێ دەست ب ئەنجامدانا نشتەگەریان کریە بۆ وان کەسێن د زکماکی دا کێماسی ھەین وەکو کێماسی ل دەڤی و دەستان و ئەو مرۆڤێن لڤێن وان پێکڤە و یێن گوھێن وان خەلەت و لێڤا کێڤریشکێ”.
ل دووماھیێ د. سالح ئەحمەد خویا کر کو ئەو ژی دگەل ڤێ رێکخراوێ کار دکەن بۆ وێ چەندێ پتر مفایی ژ سەربورا وان وەربگرن و خزمەتا خەلکێ خوە بکەن و گۆت: “ئەو نۆشدارێ ل گەل رێکخراوا یابانی ھاتیە دھۆکێ ژی خۆدان بسپوریەکا باش د وارێ نشتەگەریێن جوانکاریێ دا ئەم ژی بزاڤان دکەین مفایی ژ بسپوریا وی وەربگرین ل دەمێ ئەنجامدانا نشتەگەریان دا”.
