رێککەفتنا تورکیا و روسیا دێ مەترسیا خوە بۆ رۆژئاڤایێ کوردستانێ ھەبیت
ئه‌ڤرۆ نيوز:
سیاسەتمەدارەکێ رۆژئاڤایێ کوردستانێ دیار دکەت کو روسیا ژ ترسا ھندێ کو تورکیا ژ دەست نەدەت و تورکیا خوە نێزیکی ئەمریکا نەکەت ئۆپەراسیۆنێ ئدلبێ دا راگرتن، لێ دیسان ژی ناکۆکی د ناڤبەرا ھەر دو وەلاتان دا ھەنە و ئەز دترسم رێککەفتنا وان ببیتە ئەگەرێ ھندێ کو چەکدارێن ھشکباوەر بەرێ خوە بدەنە دەڤەرێن کوردی ب تایبەتی ژی عەفرینێ.
د. رەزوان بادینی مامۆستایێ زانکۆیێ و سیاسەتمەدارێ ناسکری یێ رۆژئاڤایێ کوردستانێ د دیدارەکا تایبەت دا ل گەل رۆژناما ئەڤرۆ بەحسێ رێککەفتنا تورکیا و روسیا ل دۆر ئدلبێ کر و راگەھاند کو ھەتا نھا ژی ناکۆکی د ناڤبەرا تورکیا و روسیا دا ل دۆر ئدلبێ ھەنە، لێ روسیا ژ ھندێ دترسیت کو تورکیا خوە پتر نێزیکی ئەمریکا بکەت و ژ بەر ھندێ ژی پوتینی ھندەک داخوازیێن ئەردۆگانی ل دۆر ئۆپەراسیۆنا ئدلبێ قەبوول کرینە و گۆت: (ھەتا نھا ناھێتە زانین کا رێککەفتن ل دۆر چ ھاتیە کرن، چونکو بەحسێ ناڤەرۆکا رێککەفتنێ نەھاتیە کرن، لێ تشتێ دیار دبیت رێککەفتنەکا ھەی و رەنگە یا بەروەخت ژی بیت، ژ بەر ھندێ ژی رەنگە د رۆژێن داھاتی دا پتر بابەت ئاشکرا ببیت).
ن
اڤبری د پشکەکا دی یا ئاخڤتنا خوە دا ئەو یەک ژی دیار کر کو ھەڤپەیمانیا تورکیا و روسیا یا بەروەختە، روسیا ژی باش دزانیت کو دێ تورکیا دێ ھەر رۆژەکێ جارەکا دی بەرێ خوە دەتە وەلاتێن رۆژئاڤا، لێ نھا ژ بۆ چارەکرنا قەیرانا سووریێ بەرپرسێن روسیا دزانن پێدڤیا وان ب تورکیا یا ھەی، چونکو تورکیا گەلەک گرۆپێن چەکدار رەوانەی سووریێ کرینە و ھاریکاریا وان دکەت و تورکیا دشێت وان گرۆپان ژناڤ ببەت یان ژی بێ چەک بکەت، ژ بەر ڤێ یەکێ ژی روسیا دخوازیت مفایێ ژ تورکیا ببینیت و گۆت: (بەرھەڤیێن مەزن بۆ دەستپێکرنا ئۆپەراسیۆنا ئدلبێ ھاتبوونە کرن، لێ ناھێتە زانین کا ئەردۆگانی چ سۆز داینە پوتینی کو بۆ ئەگەرێ ھندێ روسیا ئۆپەراسیۆنا ئدلبێ بدەتە راگرتن).
سیاسەتمەدارێ رۆژئاڤایێ کوردستانێ د دووماھیا ئاخڤتنا خوە دا ئەو یەک ژی دیار کر کو ترسا من یا مەزن گرۆپێن چەکدار یێن نھا ل ئدلبێ نە، ئەز دترسم کو پشتی رێککەفتنا تورکیا و روسیا ئەو گرۆپێن چەکدار بەرێ خوە بدەنە دەڤەرێن کوردی یێن رۆژئاڤایێ کوردستانێ، ب تایبەتی ژی عەفرینێ و ھەکە تشتەک وەسا روو بدەت دێ مەترسیەکا خوە یا مەزن بۆ کوردان ھەبیت و گۆت: (تورکیا و روسیا دشێن بۆ بەرژەوەندیێن خوە کوردان جارەکا دی بکەنە قوربانی و ھەکە تشتەک وەسا روو بدەت دێ زیانەکا خوە یا مەزن بۆ کوردان ل سووریێ ھەبیت، نزانم کا ھەتا نھا ھێزێن کوردی ل رۆژئاڤایێ کوردستانێ بەرھەڤی بۆ ڤی بابەتی کرینە یان نە، لێ دڤێت نەھێلن ئەو گرۆپێن تیرۆرستی بەرێ خوە بدەنە رۆژئاڤا و دڤێت ئاستەنگیان بۆ وان دروست بکەن).
