رەزوان برجس: کەمان روح و دەنگێ مرۆڤی یە د ناڤ مۆزیکێ دا
بێوار حەمدی:
مۆزیکژەن و سترانبێژێ گەنج (رەزوان برجس خودێ دا) ددیدارەکێ دا بۆ ڕۆژناما ئەڤرۆ گۆت: نێزیکی هەشت سالن ئەز دناڤ جیهانا مۆزیکێ دا کاردکەم و ئامیرێ من یێ سەرەکی کەمانە، لێ من شارەزای دژەنینا هندەک ئامیرێن دی ژی دا هەیە وەکو « گیتار و ساز» ژ بەر کو هەر ئامیرەیەک ل دەف من رەنگەکێ جودا یێ هەست و سۆزا هەیە.
د بەردەوامیا ئاخفتنا خوە دا دیار کر کو کەمان بتنێ پارچەیەکا تەختی نینە، بەلکو روح و دەنگێ مرۆڤی یە دناڤ مۆزیکێ دا، ئامیرەکێ هەستیارە و دشێت بێی پەیڤان ژی چیرۆکێن خەم و شادیێ بگێڕیت و گۆت: ستران ومۆزیک ژێک جودانابن، لەوما ئەز سترانان ژی دبێژم، بتایبەت سترانێن فولکلورێ رەسەن و ئەو سترانێن کو پەیامەکا مرۆڤایەتیێ تێدا هەبیت.
رەزوانی ئەو چەندە ژی دازانین، مۆزیکا گەڕۆک گەلەک دیاردەیەکا جوان و شارستانی یە و دیوارێن دناڤبەرا هونەرمەندی و خەلکی دا دشکێنیت و دیسان مۆزیکێ ژ هولێن داخستی دئینیتە د ناڤ جادەو بازاری دا و شادیێ دئێختە دناڤ دلێ خەلکێ ماندوو دا و بڤێ چەندێ ژی مۆزیک دبیتە پارچەک ژ ژیانا مرۆڤی یا ڕۆژانە.
هەروەسا گۆت: ل نێزیک مە وەکو گڕۆپێ « ئەزدا مۆزیک» نیازە خولێن ئەکادیمی یێن فێرکرنا مۆزیکێ ڤەکەین وئەڤ خولە دێ بو هەموو تەمەنان بن بتایبەت ژی بۆ گەنجێن دناڤ مالباتێن مەیێن ئێزدی دا یێن تانوکە دەرفەت بوو چێنەبوی وگۆت : ل پاشەڕۆژی مە نیازهەیە گڕۆپێ ئەزدا مۆزیک بکەینە گڕۆپەکێ ئورکێسترالی یێ مەزن.
