رەنگە شەرێ ئەتۆمی بەرپا ببیت
ئەڤرۆ نیوز ، زنار تۆڤی:
رۆژناما (غازیتارۆ) گۆتارەک ل ژێر ناڤێ شەرێ ب رێكەفت: ئەمریکا و رووسیا پێشبینیا بەرهنگاربوونێ كریە، بەلاڤەکریە و دەربارەی پێشبینیێن هەر ئێك ژ وان دو هێزان خودان چەکێ ئەتۆمینە و تێدا ئەگەرێ بەرپابوونا (جەنگێ ئەتۆم) ب رێیا (رێكەفت) دناڤبەرا واندا ب دوور نزانیت.
گۆتیه ژی ، رووسیا یان ئەمریکا یان ژی چین، رەنگە ببێ مەبەست شەرەکی ئەتۆمی بینن. چونكی سیستەمێ چاڤدێریێ و دیدەڤانیێ دڤی دەمیدا ب تنێ بۆ چاڤدێریێ و تەقاندنا مۆشەکێن بالیستی یێن ئەتۆمی ب كارناهێت، بەلكو چاڤدێریا كولاڤێ شەری یێ نە ئەتۆمی ژی دکەت، ئەڤە ژی رەنگە ببیتە ئەگەرێ روودانا خەلەتیەکا وەسا کو ببیتە ئەگەرێ بەرسڤدانێ ب گورزەکێ ئەتۆمی.
بۆ دوورخستنا روودانا كارەسات و بزاڤ بۆ روونەدانا شەرێ ئەتۆمی (ب رێكەفت)، دڤێت دەولەت چەكێ ئەتۆمی ژ چەكێ نە ئەتۆمی و تەقلیدی جۆدا بكەن، یان هەیڤێن دەستكرد یێن تایبەت دانن بۆ چاڤدێریكرنا كولاڤێن جەنگی یێن ئەتۆمی.
ل ڤێ دووماهیێ ئەگەرێ سەرهلدانا شەرێ ئەتۆمی زێدەتر بوویە، ئەو چەندا ئەڤ ترسە ژی دروستكری ب تنێ تێكچوون و گرژی و ئاڵۆزیێن پەیوەندی دناڤبەرا& روسیا و ئەمریکا دا نینە، بەلكو وازهێنانا دۆنالد ترەمپە ژ پێكگەهشتنا ئەتۆمی یە ل گەل ئیرانێ و هەروەسا تێكچوونا پەیوەندیێن دناڤبەرا هندستانێ و پاكستانێ ژی نە.
هەروەسا تێكگەهشتنەک دناڤبەرا هەموو پایتەختێن جیهانێدا هەیە دەربارەی دەرئەنجامێن كارەساتا ب كارئینانا چەكێ ئەتۆمی بۆ سەر ئەمریکا و رووسیا و ئورۆپا و هەموو جیهانێ، ژبەر هندێ شەرێ ئەتۆمی ئارمانجا چو ژ وان دەولەتان نینە، کو خودان چەكێ ئەتۆمینە یان ژی بزاڤێ دکەن بۆ هندێ کو ببنە خودان چەکێ ئەتۆمی و بدەستڤە بینن. بەلێ پەیوەندیێن ئالۆز د هەر ململانەکێدا، دبیت دووماهیێ ب ڤێ كێشمەكێشا نێڤدەولەتی و هەروەسا یا نافخۆیی ژی بینیت و ئەنجامێن جۆدا و نەخوازتی لێ بکەڤن.
