“رەوشا عیراقێ پێدڤی ب چارەسەرێن نێڤدەولەتی ھەیە”
ئه‌ڤرۆ نيوز:
چاڤدێرەکێ سیاسی ئاماژە بوێ چەندێ دکەت، ھەکە جڤاکێ نێڤدەولەتی و وەلاتێن زلھێز چارەسەریەکێ بۆ ئالۆزیێن نوکەیێن عیراقێ نەکەن، زەحمەتە رەوش بھێتە کۆنتڕۆلکرن ھەروەسا دیار، پێک ئینانا حوکمەتا نوو دێ کەڤیتە دووماھیا ئەڤسالە یان دەستپێکا سالا نوو.
دکتۆر محەمەد شاکر، چاڤدێرێ سیاسی بۆ رۆژناما ئەڤرۆ گۆت: ڤان سالێن دووماھیێ چەندین ئاریشە بۆ عیراقێ پەیدابووینە و خۆنیشاندانێن ڤێ دووماھیێ ژی لباشوورێ عیراقێ زێدەتر رەوشا عیراقێ ئالۆزکریە، ھەروەسا پاشکەفتنا راگەھاندنا ئەنجامێن ھەلبژارتنان کاریگەری ل سەر ئالۆزبوونا رەوشا عیراقێ ھەبو، چونکە بۆ ئەگەرێ ھندێ وەلاتیێن عیراقی زێدەتر بێ ئومێدبن ل چارەسەرکرنا رەوشا ئالۆزیێن عیراقێ و ئیدی وەلاتیێن عیراقی ھێز نەمایە چاڤەڕێی سۆزێن دەستھەلاتدارێن عیراقێ بکەن، ھەتا گەھشتیە ئاستەکی نەک وەلاتیان حوکمەت و حزبێن عیراقی نەڤێن، بەلکو دخوازن ئەڤێن عیراق گەھاندیە ئەڤێ رۆژێ بھێنە سزادان و لێپرسین دگەلدا بھێتەکرن.
ئەڤی چاڤدرێرێ سیاسی گۆتژی: زۆر جارا وەلاتێن بیانی دەست ل کاروبارێن عێراق وەردەن و بڕیارێ لدۆر چارەنڤیسێ عیراقێ ددەن، لەوڕاژی ئاریشەیێن نوکە عیراق تێدا دەربازدبیت گەھشتیە ئاستەکی لڤێ خراپتر نابیت، بدیتنامن رەوشا عیراقێ یا د قۆناغەکا مەترسیداردا دەرباز دبیت و پێدڤیە جڤاکێ نێڤدەولەتی و وەلاتێن زلھێز بھێنە سەر خەت و چارەسەریەکێ بۆ ئالۆزیێن نوکەیێن عیراقێ ڤەبینن، ھەتا دووماھی ب ئەڤێ پێلا خۆنیشاندانێن وەلاتیێن باشوور بھێت و خزمەتگوزاری و داخوازیێن خۆنیشاندەران بھێنە بجە ئینان، چونکە ژبیر نەکەین مافێ وەلاتیانە خۆنیشاندانان بکەن و حوکمەتا عیراقێ یا خەمساربوویە ل گەھاندنا پڕۆژێن خزمەتگوزاری و عیراقێ داھاتەکێ زۆر ھەیە و دڤێت وەلاتی مفاداربن و ژیانەکا شایستە ھەبیت، مخابن گەندەلیێ ھەموو کەرت و جھەک ڤەگرتیە دەسھەلاتدارێن عیراقێ گونەھبارن لھەمبەر بھەدەر دانا سامانێ عیراقیان.
ل دۆر پێکئینانا کابینا نوویا حوکمەتا عیراقێ دکتۆر محەمەد شاکر گۆت” پشتی ئەنجام تێنە پەسەندکرن، دێ مەزنترین کۆتلا پەرلەمانی ھێتە پێکئینان و دووڤدا دێ رێکارێن قانوونی ھێنە بجە ئینان بۆ دیارکرنا سەرۆک وەزیران و پێکئینانا حوکمەتا نوو، بەلێ ئەڤە چەند ھەیڤ بۆرین ھێشتا چو پێنگاڤێن پێدڤی نەھاتینە ھاڤێتن بۆ گەھشتن ب رێککەفتنێ دناڤبەرا لایەنێن سیاسی و سەرکەفتی د ھەلبژارتنێن بۆری دا یێن پەرلەمانێ عیراقێ، لەوڕا ئەز پێشبینی دکەم یان دووماھیا ئەڤسالە یانژی دەستپێکا سالا بھێت دێ حوکمەتا نوویا عێراقێ ھێتە پێک ئینان.
