رەڤەندا کوردی دخوازیت قۆنسۆلەکێ عیراقێ ل ئەلمانیا کورد بیت
ئەڤرۆ نیوز، زنار تۆڤی:
کەمپینەک دەستپێکریه، بۆ کۆمکرنا ئیمزایان ل سەرانسەری ئەلمانیا، ژبۆ دانانا قۆنسۆلەکێ کورد ل ئەلمانیا دیسان وان نامەکا ڤەکری هنارتیه بۆ..
سەرۆکاتیا پەرلەمانێ کوردستانێ
سەرۆکاتیا حوکمەتا کوردستانێ
فراکسیۆنێن کوردستانێ ل پەرلەمانێ عیراقێ
وەزیر و پلەدارێن کورد ل حوکمەتا عیراقێ، داخواز ژێ کریە، کو قۆنسۆلەکێ عیراقێ ل ئەلمانیا کورد بیت.
ئارمانج نێروەیی جێگرێ سەرۆکا کومەلا دۆستانیا کورد ئەلمان ل ئەلمانیا، بۆ ئەڤرۆ نیوز دیار کر: ئەم وەکو کۆمەلا دۆستایەتیا کورد و ئەلمان ل ئەلمانیا، هەروەسا رەڤەندا کوردی ل ئەلمانیا، داخوازەکا رەوا پێشکێشی هەوە یێن بەرێز دکەین، کو وەکو ماف پێدڤیە ژ کۆمارا فیدرالیا ئەلمانیا بالیۆزی کۆمارا فیدرالیا عیراقێ کورد بیت، ژبەرکو ھژمارا رەڤەندا کوردی پترە ژ یێن دیتر.
هەروەسا دبێژیت: یا خویایە کو د رێککەفتنێن دناڤبەرا پارتێن سەرکەفتی د ھەلبژارتنێن عیراقێ دا، بالیۆز هاتیە ئێکلا کرن و بەهرا کوردان نینە، ئەم ژی بارێ هەوە گران ناکەین، بەلێ داخوازا ئێک ژ قونسۆلان دکەین، کو ل ئەلمانیا دو قونسۆلخانە ھەنە ئێک ل بەرلین، ئێک ژی ل فرانکفورت.
رێژا رەڤەندا کوردی زێدەترە ل ناڤەراست و ژێریا ئەلمانیا، کەواتە داخوازا قونسۆلێ فرانکفورت دکەین بۆ کوردێن ئەلمانیا.
ناڤهاتی گۆت ژی: ئەم وەکو کۆمەلەکا فەرمی و باوەرپێکری یا کوردی – ئەلمانی و کار و خەباتا مە دۆستایەتیا دناڤبەرا دو گەلێن کورد و ئەلمانە، خەمخۆریا رەڤەندا کوردی دزانین و کار بۆ مافێن وان یێن رەوا دکەین، ئەم پشتگری و ھەڤکاریا خوە بۆ رەڤەندا کوردی دەردبرین، ئەم ئاگەهدارین هەر ژ رۆخانا رژێما ناڤچۆیی یا بەعس و دروستبوونا حوکمەتا عیراقێ، هەتا نوکە ل ئەلمانیا ھەر رەڤەندا کوردی کەفتیە بەر کێشە و بارگرانی و ئاستەنگان، ژ بەر برێڤەنەچوونا کار و بارێن وان.
ئەو ژی ئاشکرا کر: کو ھاتنوچوون و دووریا جهێ قونسۆلخانێ ژ رەڤەندا کوردی، پرانیا جاران راستی دەرکرنێ دهێن ژ ئیش و کاران، خەرجیەکا زۆر و ماندوبوونەکا مەزن دبەن، ب تنێ بۆ برێڤەبرنا کارەکێ خوە، چ دەرخستنا پاسپۆرتێ یان ژی نامەکا پشتگیریێ یان پەسەندەکێ، ھەرچەندە ھندەک ژ کارمەندێن قونسۆلخانان ھەڤکاریا رەڤەندا کوردی دکەن، بەلێ وەکو پێدڤی نینە، لەوما ب پێدڤی دزانین ئێک ژ قونسۆلخانان بدەنە کوردان، داکو رەڤەندا کوردی چاوا د دەستوری دا مافێن کوردان د زمانی و ھەبوونێ دا هاتینە دەست نیشان کرن، ژێ مفادار بن.
