زاخۆ: بارانێ زێدەتری 100 دونەمێن چاندنی ژ ناڤ برینە
ئەڤرۆ نیوز، عەلی حاجی:
د داخویانیەکێ دا، ئەحمەد سامی، رێڤەبەرێ چاندنێ ل زاخۆ بۆ ئەڤرۆ نیوز دیار کر کو ژ بەر ھاتنا رێژا زۆرا بارانێ ل کۆمەلگەھا پێشابوورێ، ئەو خەلکێ کارێ چاندنێ کری ل بەر لێڤا ئاڤا خابیری تووشی زیانێن زۆر بووینە و لژنەکا ڤەدیتنێ ژی ھاتیە رەوانە کرن بۆ زانینا زیانێن بەر ب جۆتیارێن وێ دەڤەرێ کەڤتین.
ئەحمەد سامی گۆت: ژ بەر کو گەلەک پشکەکا جوتیارێن دەڤەرا پێشابوورێ کارێ جۆتیاریێ ل بەر لێڤا خابیری دکەن ب مەرەما چاندنێ، ژ بەر ھاتنا رێژەکا زۆرا بارانێ زێدەتری 100 دونەمێن چاندنێ یێن وان جوتیاران ژ ناڤ چووینە و ئاڤێ ل گەل خوە برینە و جۆتیارێن وێ دەڤەرێ ژی ھزر ل دانانا ساترەکێ نەکر بوو دا کو تووشی زیانەکا ب ڤی رەنگی نەبن، کارێ لژنا مە یێ بەردەوامە بۆ زانینا زیانێن بەر ب جۆتیارێن مەسیحیێن وێ دەڤەرێ کەڤتین و لژنەکا تایبەت ژی یا ھاوارھاتنێ ھاتیە پێکئینان ب مەرەما قەرەبووکرنا زیانڤێکەڤتیان.
ناڤھاتی زێدەتر گۆت: پشتی لژنە راپۆرتا خوە ب دووماھی دئینیت دێ ب رێیا نڤیسیارەکێ بۆ رێڤەبەریا گشتی یا چاندنێ ل پارێزگەھا دھۆکێ رەوانە کەین و ئەو ژی ژ لایێ خوە ڤە دێ بۆ پارێزگەرێ دھۆکێ ھێتە رەوانە کرن دا کو ل نێزیکترین دەم دا ئەو جۆتیار بھێنە قەرەبووکرن، پرانیا ئەو ئەردێ زیان ڤێ کەفتی د چاندنێ بوون و چەندین بەرھەمێن چاندنێ ل سەر وان دونەمان ژ لایێ جۆتیاران ڤە ھات بوونە چاندن.
