زاخۆ ناڤێن مەزن و ئاریشەیێن تەكتیكی
ئیحسان حەسەن
دیارە لڤی وەرزی كارگێریا یانەیا زاخۆ پتر ژ هەر دەمەكی پووتە دایە تیما خوە یا فوتبۆلێ ئەوا پشكدار دخولا ستێرێن ئیراقێ دا، پشتی بازارێ ڤەگوهاستنا یاریزانان ب ئینانا ناڤێن مەزن و بوهایەكێ گران رێزێن خوە پێ موكمكرین، بۆ هندێ پەیامەكێ بدەتە هەموو یانەیێن ئیراقێ كو ئەڤ سالە تنێ بۆ پشكداریێ بەشدار نابیت، بەلكو چاڤێ وێ دێ ل دروستكرنا دیرۆكەكا نوو بیت، ئەوژی برنا ئێكەم ناسناڤێ خولێ، بەلێ ددەستپێكا وەرزی دا بدەستڤەئینانا تنێ سەركەڤتنەكێ ژ سێ یاریان دگەل تیمێن ژخوە كێمتر پرسیارەكا جدی لدەڤ پشتەڤان و حەژێكەر و چاڤدێران پەیدا دكەت، ئەرێ كومكرنا ڤان هەموو ستێران تێرا هندێ هەیە كو ناسناڤێ خولێ بدەستڤە بینن، یان كێشەیەكا تەكتیكی درێڤەبرنا ڤێ تیما مەزندا هەیە؟ ژبەركو پێكهاتییێ زاخۆ لڤی وەرزی ناڤێن هەرە دیار تێدا نە ژوانا گۆلكەرێ وەرزێ بوری شیزۆرد دیمترۆڤ ل هێلا پێشیێ، دیسان هەبوونا هەر ئێك ژ ئاكام هاشم ل بەرگیریێ و مایسترو هارۆن ئەحمەد، عەلی جاسم، شێركو كەریم، ئەمجەد عەتوان و ئورینیوی ل هێلا ناڤین و هێرشبەریێ، ژبلی وان پیشەكارێن نها و یێن وەرزێ بوری یێن كو بەرەڤانییێ ژ درێسێ یانەیێ دكەن، ئەڤ كاروانێ ژ ستێران دڤێت پتر باوەریێ بدەنە تیمێ، بەلێ ئەنجامێن دەستپێكێ هووسا نیشان ددەن كو ئینانا ناڤێن مەزن ب تنێ بەس نینە ئەگەر تە پلانەكا تەكتیكی یا تمام ل پشت نەبیت، دیارە هەتا نها راهێنەرێ فرەنسی لورانت بانید نەشیایە ڤان ستێران دناڤ ئێك پێكهاتییێ بهێز دا بكار بینیت، كێشەیا سەرەكی نەبوونا ناسنامەیا تەكتیكی یا روون بوویە، پێدڤی یە راهێنەر شێوازێ یاریا خوە ب گوهۆریت و بزانیت دێ چەوا مفایی ژ شیانێن ڤان یاریزان بینیت، ب گرێدانا هەر سێ هێلان پێكڤە، نەك ب تنێ پشت بەستنێ لسەر شیانێن كەسوكی بكەت، هەروەسا دەمێ ئەڤ ناڤێن مەزن پێكڤە یاریێ دكەن، پێدڤییە ب روونی ئەركێ هەر یاریزانەكی دیاربیت داكو زاخۆ هەڤسەنگیا دناڤبەرا هێرشبرنێ و بەرگێریێ پەیدابكەت، دیسان دەمێ تەپە ژێ دهێتە ستاندن نەكەڤیتە لبن فشارێدا، ژبەر كو ئەڤ یاریزانە ژ یانەیێن جورو جور هاتینە پێدڤییە ددەمەكێ كورت دا گیانێ یاریا بكۆم دناڤبەرا واندا ئاڤابكەت، چونكو بتنێ ستێر ئەنجامێن یاریان و دەستكەڤتان ئێكلاناكەن، بەلكو تیم ناسناڤان دئینن، ژلایەكێ دیڤە پێدڤییە پشتەڤانێن زاخۆ و كارگێریا یانەیێ و دەستەكا راهێنانێ بزاڤێ بكەن، گڤاشتنا دەروونی و راگەهاندنێ لسەر یاریزانێن خوە كێم بكەن، داكو بشێن ب ئارامی یاریێ بكەن، زێدەباری هندێ خولا ئیراقێ یا درێژە و پێدڤی ب نەفسەكا مەزن و بهێز هەیە، لەوما پێدڤییە زاخۆ بشێت رەفتارێ دگەل هەموو رەوشان بكەت، ب تایبەت یێن گرێدای هنگاڤتن و سزایان داكو ئاستێ خوە ژ دەست نەدەت، یا من دڤێت ل دووماهییێ بێژم مافێ جەماوەرێ زاخۆ ژ هەر دەمەكی پترە چاڤەرێ ئاهەنگا برنا ناسناڤی ببیت، بەلێ پێدڤییە بزانن كو ناڤێن مەزن تنێ ئالایێ هەڤركییێ بلند ناكەن، بەلكو تەكتیكا دروست و خەبات بەردەوام و گیانێ ئێكگرتنێ دێ تیمێ بەرەڤ ئارمانجێ ببەت، ئەڤە ژی كارێ سەرەكییێ دەستەكا راهێنانێ یە.
