زارۆيێن شه‌هيد و ئه‌نفالكرى و زيندانيێن سياسى ژ دانا پارێ خواندنێ هاتنه ئازاكرن
ئه‌ڤرۆ نيوز:
حوكمه‌تا هه‌رێما كوردستانێ بڕيار دا پارێ خواندنێ ژ پێش زارۆيێن شه‌هيد و ئه‌نفالكرى و زيندانيێن سياسى ل هه‌موو ناڤه‌ندێن ئه‌هلى و حكۆمى دابين بكه‌ت.
به‌ره‌ڤان حه‌مدى، رێڤه‌به‌رێ گشتيێ وه‌به‌رهێنان و داهات ل وه‌زاره‌تا كاروبارێن شه‌هيدان و ئه‌نفالكريان بۆ رووداو گۆت: “به‌رى نوكه ئه‌ڤ بڕياره هه‌بوو، به‌لێ نوكه هاته نووكرن”.
كۆتژى: “ئه‌ڤه جهێ دلخۆشيێ يه، به‌رى نوكه دانوستاندن ل سه‌ر هه‌بوو كو رێژه‌كا پاره‌ى ل سه‌ر حوكمه‌تێ بيت و رێژه‌ك ژى ل سه‌ر قوتابى بيت، به‌لێ خۆشبه‌ختانه پشتى دانوستاندنه‌كا زۆر، حوكمه‌تێ بڕيار دا 100% ل سه‌ر حوكمه‌تێ بيت”.
نوكه ل پشكه‌كا زانكۆيێن حكومى خواندن ب پاره‌يه، ژ به‌ر هندێ نه ب تنێ ل قوتابخانه و زانكۆيێن تايبه‌ت، بڕيار ئه‌وان قوتابيان ژى ڤه‌دگريت يێن ل زانكۆيێن حكۆمى ژى دخوينن.
هه‌ر ب گۆره‌ى بڕيارا حوكمه‌تێ كو ل 5ى كانوونا ئێكێ ده‌ركه‌فتيه و ئيمزا نێچيرڤان بارزانى سه‌رۆك وه‌زيرێن هه‌رێما كوردستانێ ده‌رچوويه، ئێك زارۆيێ زيندانيێن سياسى ژى دێ ژ پارێن خواندنێ هێته ئازاكرن، ئانكو هه‌كه زيندانيێ سياسى چه‌ند زارۆيه‌ك هه‌بن و بخوونن، ئێك ژ وان دێ ژ دانا پاره‌ى هێته ئازاكرن.
