زارۆیەکێ دھۆکێ تووشی نەخۆشیەکا کێم وێنە بوویە
ئەڤرۆ نیوز:
بەری پێنج ھەیڤا و پشتی دایکا وی بریە سەرشوویێ و بەری ئاڤێ لێ بکەت ددەستێن وێ دا تێک دچیت و ب ناگەھی دگەھینن نەخۆشخانا تەنگاڤیان ل زاخۆ، ئیسماعیلێ بابێ وی دبێژیت: نوشداران گۆتە مە یێ مری، بەلێ پشتی دەرزیکەک ل دلێ وی دای جارەکا دی ڤەگەریا ژیانێ.
ئیسماعیلی، ژبلی بنیامێنی، کورەک و دو کچێن دی ھەنە، کورەکێ وی ل عەمرێ سێ ھەیڤیێ مر بوو، و ئەگەرێن مرنا وی نەھاتبوونە زانین، دکتورەک دبێژیت: ھەر چەندە مە پێزانین ل سەر وی کوری نەبووینە، بەلێ رەنگە نەخۆشیا ویژی وەکو یا بنیامێنی بیت، کو جارا ئێکێ یە ل رۆژھەلاتا ناڤین د ڤی عەمری دا دھێتە دەستنیشانکرن، بنیامێن ئەڤە پێنج ھەیڤە ژ ئینعاشا نەخۆشخانا ھیڤی دەرنەکەڤتیە و بوویە ھەڤالێ ستافێ نەخۆشخانێ.
د.صەلاح عەبدولکەریم، تایبەتمەندێ نەخۆشیێن زارۆیان و بەرپرسێ پشکا چاڤدێریا چر ل نەخوشخانا ھیڤی یا زارۆیان دیارکر کو نەخۆش بنیامێن ئیسماعیل، ل رۆژا 6/7/2015 ژ زاخۆ ھاتیە ڤەگوھاستن بۆ پشکا ئینعاشێ کو ل وی دەمی عەمرێ وی دو ھەیڤ بوون و ئاریشا ئەوبوو دو ھەتا سێ جارا دلێ وی د راوەستیا، ب رێیا ڤێراگەھشتنێن دەستپێکێ دزڤریڤە، بێی کو نەخۆشیا وی بھێتە زانین، ھندەک جارا دگۆتن د سەرشووشتنێ دا یێ وە لێ ھاتی و جار ژی دگۆتن تەبە و ھندەک جارا ژی دگۆتن دگەل تایێ وەلێ دھێت، پشتی ھاتیە لایێ مە ھەر وێ رۆژێ دلێ وی راوەستیا و ب لێدانێن کارەبێ زڤری ڤە و رۆژا ددووڤدا ھاتە ڤەگوھاستن بۆ ئینعاشێ و گۆت: مە دەست ب پشکنینان کر و ئەم گەھشتینە ئەنجامەکی کو ئەڤ نەخوشیە دبیتە ئەگەرێ تێکچوونا تەوژما کارەبا دلی، و پشتی مە گەلەک دووڤچوون ژی کری دیاربوو کو جارا ئێکی یە ل رۆژھەلاتا ناڤین حالەتەک د ڤی عەمری دا بھێتە دیتن، ئێکەم حالەتێ ب ڤی رەنگی عەمرێ وی شەش ھەیڤ بوو ل فرەنسا ھاتیە دەستنیشانکرن.
د.صەلاح دیارکر ل گەل دەستنیشانکرنا نەخۆشیێ وان دەست ب چارەسەریێ کر و گۆت:ل دەستپێکێ بەرسڤدان بۆ چارەسەریێ ھەبوون ب رێیا وەرگرتنا جورەکێ حەبکا، پشتی ھینگی رەجفینا دلی زێدەتر لێ ھات و مە دەست پێکر ب لێدانا تەوژمێن کارەبێ و ئەز دشێم بێژم د وان پێنج ھەیڤێن بۆری دا پتر ژ 100 جارا یێ وەلێ ھاتی و کارەب ھاتیە لێدان.
ل دۆر ئەگەرێن نەخۆشیێ، د.صەلاح دیارکر پەیدابوونا نەخۆشیێ پتر زکماکینە و ژ جیناتا پەیدادبیت، ھەر د وێ خێزانێ دا زارۆیەکێ وان د سێ ھەیڤیێ دا مر بوو، بەلێ دیارنەبوو کا ئەو نەخۆشی یە یان نە، چونکو نەھاتبوو دەستنیشانکرن، ھەر ل وی دەمی ھەموو خێزان ھاتیە پشکنینکرن و مە گومان ھەیە کو حالەتەکێ دیتر ژی ل وێ خێزانێ ھەبیت، بەلێ ھێشتا دووڤچوون بۆ دڤێت.
ل دووڤ گۆتنێن بەرپرسێ پشکا چاڤدێریا چر، حالەتێن ب ڤی رەنگی پتریا جارا پشتی زارۆ لڤینێ دکەت دھێنە دەستنیشانکرن، و ھندەکێن دیتر د قۆناغا سنێلەیێ دا پەیدادبن و ئەڤ نەخۆشیە گەلەک یا کێمە و ھەر ئێک ژ 25 ھزار ھەتا 100 ھزار تووش دبنێ.
دیارکر ژی پشتی نەخۆشی دھێتە دەستنیشانکرن دەست ب چارەسەریێ دھێتە کرن و حەب بۆ دھێنە دان، ھەکە بەرسڤدان ھەبیت دێ بەردەوام بۆ ھێنە دان، ھەکە مفا نەدیت نەچارن رێکێن دی ب کاربینن وەکو نشتەرگەری و نشتەرگەری ژی یان بۆ ھندەک رەھا دھێتە کرن و نەخۆش پێدڤی ب ئامیرەکی دبیت کو کاردکەت بۆ زێدەکرنا لەمزێن دلی و دیسا دێ پێدڤی ب ئامیرەکێ دیتر بیت کو وەکو یێ D.C یە بەلێ یێ بچووکە دکەنە دلی دا و گۆت: ئەڤە پێنج ھەیڤە ل خەستێ و ئێکەم جارە 100 جارا کارەب بۆ دلێ زارۆیەکێ ب ڤی عەمری دھێتە لێدان و پشتی ھەموو ھەولدانێن نەخۆشخانێ و ئەنجامدانا نشتەرگەریەکا سەرکەفتی ل سلێمانیێ، پێشبینیێ دکەم بھێتە دەرخستن و نوکە ل ژڤانێ راکرنا قەیدکێن وینە و پاشی ڤەگەریتە مالا خوە و ئەڤ ئامیرە ھەتا ھەتایێ دێ کارکەت و ھندەک جارا پێدڤی ب پرۆگرامکرنێ دبیت و دێ شیت ژیانا خوە نورمال دەربازکەت.
چاوا ئامیرە گەھشت؟
د.ئازاد عەبدولجەبار، ھاریکارێ رێڤەبەرێ نەخۆشخانا ھیڤی یا زارۆیان دیارکر پشتی نەخۆش بۆ دەمێ پێنح ھەیڤا ل نەخوشخانێ مایی، گەلەک ھەول دان، چارەسەریێ بۆ نەخۆشی ببینین، چونکو دەرمانا مفا نەکر و سەنتەرێ دلی ل دھۆکێ نوشدار گەلەک جارا ھاتن سەرەدانێ بەلێ چارەسەری بۆ نەھاتە دیتن. د.ئازاد دیارکر ل دەستپێکێ وان پەیوەندی ل گەل نەخوشخانەکا وەلاتێ ھندێ کر، ئەوان بەرسڤدا کو دشێن د 48 دەمژمێَرا دا چارەسەربکەن، بەلێ پتر 10 ھزار دولار بۆ دڤیان، لەورا وەکو نەخوشخانە بریار دا وی کوژمێ پارەی بۆ لێک بدەن، نوشدارەک و پەرستارەکێ ژی ئامادەییا خوە دیارکر ئامیرێن پێدڤی ل گەل خوە ببەن و ل گەل بچنە وەلاتێ ھندێ، و گۆت: پشتی گەلەک پەیوەندیا بۆ مە دیاربوو نوشدارەکێ عەرەب ل سلێمانیێ ھەیە و دشێت ڤێ نشتەرگەریێ بکەت، بەلێ ئامیرە نەبوون و نەچاربووین پەیوەندیێ ب بەغدا بکەین و ل دووماھیێ بەرسڤ دا کو ئامیرەک ب تنێ ل باژێرێ ناێریێ ھەیە، وانژی رازیبوونا خوە دیارکر کو وی ئامیرەی ڤەگوھێزن و بۆ وی زارۆکی بھێتە دانان.
دیارکر ژی ئەڤ چەندە کارەکێ ب ساناھی نەبوو، لەورا ب رێیا کومپانیەکێ کو کارێ شیرێ زارۆیان دکەت ئەو ئامیرە گەھاندە سلێمانیێ و پشتی ھەموو تشت ئامادەبووین ب رێیا ترۆمبێلەکا ئەمبولانس نوشدارەکا نەخوشخانێ ل گەل پەرستارەکێ ئەو زارۆ گەھاندە سلێمانیێ و نشتەرگەری ب سەرکەفتیانە بۆ ھاتە ئەنجامدان و جارەکا دی ڤەگوھاستە نەخوشخانا ھیڤی.
د.ئازاد دیارکر کو پێدڤیە سندوقەکا ھاریکاریێ بۆ کارێن ب ڤی رەنگی بھێتە دانان و دیسا پێدڤیە ھەڤکاری ل گەل نەخوشخانێن دی ھەبیت بۆ چارەکرنا ڤان جورە حالەتا.
