زانا رۆستايى: به‌غدا چو ژڤان بۆ هنارتنا مووچه و بودجا هه‌رێمێ ديار نه‌كرينه
ئه‌ڤرۆ نيوز، عه‌زيز هه‌ورامى:
ئه‌ندامه‌كێ جڤاتا نوونه‌رێن عيراقێ ئاشكه‌را كر كو هه‌تا نوكه چو ژڤان بۆ هنارتنا مووچه و بودجێ نينه و دا زانين كو هه‌تا نوكه ئه‌و نوزانن كا دێ ل به‌رى يان پشتى هه‌لبژارتنان هێته ره‌وانه‌كرن.
زانا رۆستايى، ئه‌ندامێ جڤاتا نوونه‌رێن عيراقێ ل سه‌ر فراكسيۆنا كۆمه‌لا ئيسلامى بۆ ئه‌ڤرۆ نيوز دياركر كو سه‌رۆك وه‌زيرێن عيراقێ رۆژا هنارتنا مووچه و بودجێ هه‌رێما كوردستانێ ديار نه‌كريه و گۆت: “ئه‌و ئاخفتنێن نوونه‌رێن كورد ل به‌غدا به‌حس دكه‌ن چو راستى ژبوو نينه”.
زێده‌تر گۆت: “چه‌ندين جاران ل گه‌ل سه‌رۆك وه‌زيرێن عيراقێ كۆمبووينه و چو رۆژه‌ك ده‌ستنيشان نه‌كريه كو بێژن دێ ل ڤێ رۆژێ مووچێ فه‌رمانبه‌رێن كوردستانێ هێته ره‌وانه كرن”.
ئاشكه‌را ژى كر كو د ئاخفتنێن خوه دا ئاماژه ب وێ چه‌ندێ كريه كو هه‌ر ده‌ما هووربينى د هه‌موو وه‌زاره‌تان دا ب دووماهى هات، ل وى ده‌مى دێ به‌حس ل سه‌ر هنارتنا مووچێ فه‌رمانبه‌ران كه‌ن.
ل دووماهيێ ژى گۆت: “هه‌تا نوكه ديار نه‌بوويه، كا ئايا هنارتنا مووچێ فه‌رمانبه‌رێن هه‌رێما كوردستانێ دێ كه‌ڤيته به‌رى يان پشتى هه‌لبژارتنێن عيراقێ”.
