زانكۆيا ئوكسفۆرد 140 كورسيێن خواندنێ راگه‌هاندن
ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، زانكۆيا ئوكسفۆرد يا بريتانى 140 سكۆله‌رشيپ بۆ هه‌موو وه‌لاتێن جيهانێ رادگه‌هينيت وئه‌وێن ل هه‌رێما كوردستانێ ژى دخوازن ل وێرێ بخوينن، دشێن داخوازا خوه پێشكێش بكه‌ن، ئه‌ڤه ژى دده‌مه‌كى دايه كو هه‌موو خه‌رجيێن ڤێ سكۆله‌رشيپێ ل سه‌ر ستوويێ زانكۆيا ئوكسفۆرده.
ئێك/ مه‌رجێن خواندنا ماسته‌رێ:
- پێدڤيه پێشكێشكار وه‌لاتيێ هه‌رێما كوردستانێ بيت
- پێشكێشكار هه‌كه فه‌رمانبه‌ر بيت يان مامۆستا بيت ل ئێك ژده‌زگايێن هه‌رێما كوردستانێ، پێدڤيه ب لايه‌نێ كێم دو سالان خزمه‌ت هه‌بيت پشتى بده‌ستڤه‌ئينانا باوه‌رنامێ، ئانكو پشتى بده‌ستڤه‌ئينانا دووماهى باوه‌رنامه، هه‌كه فه‌رمانبه‌ر نه‌بيت پێدڤى ناكه‌ت دو سال ب سه‌ر باوه‌رناما وى ڤه ده‌رباز ببن.
- پێدڤيه تێكرايێ به‌كالوريوسێ ژ 65% كێمتر نه‌بيت، هه‌روه‌كو وان كه‌سێن كو ئه‌نجامێن وان ( مام ناوه‌ندى، باش، زۆر باش، ناياب) ل باوه‌رنامێن وان هاتيه نڤيسين، دڤێت ژلايێ جهێن په‌يوه‌نديدار ڤه بهێته گوهۆرين بۆ نمره ( بۆ نموونه 65) به‌روڤاژى ل وه‌زاره‌تا مه كار پێ ناهێته كرن.
- پێدڤيه ژيێ پێشكێشكارى ژ 45 ساليێ زێده‌تر نه‌بيت.
- پێدڤيه پێشكێشكار ل هه‌مان بوارێ خوه داخوازێ بۆ به‌رنامێ ماسته‌رێ پێشكێش بكه‌ت، ئانكو به‌كالوريوس وماسته‌را وى ده‌مان بوار دا بيت.
- به‌ربژارێ سه‌ركه‌فتى هه‌كه يێ دامه‌زراندى بيت، دێ ژلايێ وه‌زاره‌تا په‌يوه‌نديدار تنێ مۆله‌تا خواندنێ پێ هێته دان ئانكو ب مووچێ بنه‌ره‌تى وده‌رمالێن جێگير.
- پێشكێشكرن دێ راسته‌وخوه ب رێيا ڤى لينكى بيت
دوو/ مه‌رجێن خواندنا دكتۆرايێ
- پێدڤيه پێشكێشكار وه‌لاتيێ هه‌رێما كوردستانێ بيت.
- هه‌كه پێشكێشكار فه‌رمانبه‌ر بيت يان مامۆستا بيت ل ئێك ژده‌زگه‌هێن هه‌رێما كوردستانێ، پێدڤيه ب لايه‌نێ كێم دو سالان خزمه‌ت هه‌بيت پشتى بده‌ستڤه‌ئينانا دووماهى باوه‌رنامه، ئانكو پشتى بده‌ستڤه‌ئينانا دووماهى باوه‌رنامه، هه‌كه فه‌رمانبه‌ر نه‌بيت پێدڤى ناكه‌ت دو سال ل سه‌ر باوه‌رناما وى ده‌رباز ببن.
- پێدڤيه تێكرايێ وى ل ماسته‌رێ ژ 70% كێمتر نه‌بيت، ئه‌و كه‌سێن كو ئه‌نجامێن وان ب پلێن (ناڤه‌ند، باش، زۆر باش، ناياب) ل باوه‌رنامێن وان هاتينه نڤيسين، دڤێت ژلايێ جهێ په‌يوه‌نديدار ڤه بهێته گوهۆرين بۆ نمره ( بۆ نموونه 70) به‌رۆڤاژى كار ل سه‌ر ناهێته كرن ژلايێ وه‌زاره‌تێ ڤه.
- پێدڤيه ژيێ پێشكێشكارى ژ 50 ساليێ زێده‌تر نه‌بيت.
- دڤێت پێشكێشكار دهه‌مان بوارێ خوه داخوازا بۆ به‌رنامێ دكتۆرايێ پێشكێش بكه‌ت، ئانكو ماسته‌ر ودكتۆرايا وى ل هه‌مان بوارى بيت.
- به‌ربژارێ سه‌ركه‌فتى هه‌كه يێ دامه‌زراندى بيت، ژلايێ وه‌زاره‌تا په‌يوه‌نديدار ڤه تنێ مۆله‌تا خواندنێ دێ پێ هێته دان، ئانكو ب مووچێ بنه‌ره‌تى وده‌رمالێن جێگير.
- پێشكێشكرن راسته‌وخوه دێ ب رێيا ڤى لينكى بيت.
ديسا دياركريه كو دووماهى ژڤان بۆ پێشكێشكرنێ 25/1/2019 يه.
