زڤستانا ئه‌ڤ ساله دێ پێدانا كاره‌بێ زێده‌تر لێ هێت
ئەڤرۆ نیوز، نيوار محه‌مه‌د سه‌ليم:
ئاخفتنکەرێ وەزارەتا کارەبێ راگەھاند کو پێدانا کارەبێ بۆ زڤستانا ئەڤ سالە ل ھەمبەر سالێن بۆری دێ باشتر بیت، چونکو چەند پرۆژەکێن دی یێن بەرھەمئینانا کارەبێ خستینە وارێ بجھئینانێ و کارەبا زێدەتر دایە وەلاتیان.
محەمەد ھەورامی، ئاخفتنکەرێ ب ناڤێ وەزارەتا کارەبێ بۆ ئه‌ڤرۆ نيوز راگەھاند کو بۆ زڤستانا ئەڤ سالە ھەروەکو سالا بۆری کێم نابیت، چونکو ھندەک پرۆژێن دی یێن نوو ھەنە کو ژ لایێ وەزارەتا کارەبێ ڤە ھێنە بجھئینان و بەرھەمئینانا کارەبێ زێدە بیت، پرۆژەکێ دژی یێ کارەبێ ھەیە ل خەبات کو 300 مێگاواتە ئەو ژی دێ کەڤیتە کاری ل گه‌ل وێ چه‌ندێ دێ غازا زێده‌تر بۆ به‌رهه‌مئينانا كاره‌بێ ب وه‌زاره‌تێ هێته دان.
ئاماژە ب وێ چەندێ ژی کر کو ل وەرزێ زڤستانێ خواست ل سەر بکارئنیانا کارەبێ ژ لایێ وەلاتیان ڤە زێدە دبیت، ژ بەر ھندێ ژی ل وەزرێن زڤستان و ھاڤینێ کارەبا نشتیمانی کێم دبیت.
ب گۆرەیی ئامارێن وەزارەتا کارەبێ، ژمارا ھەڤپشکێن کارەبێ ل ھەرێما کوردستانێ نوکە زێدەتری ملیۆنەک و 400 ھزار ھەڤپشکن و رێژا بەرھەمئینانا کارەبێ ژی دو ھزار و 500 مێگاواتە و پترترین خواست ژی ل سەر کارەبێ زڤستانا سالا بۆری ھاتیە تۆمارکرن کو گەھشتیە زێدەتری شەش ھزار مێگاواتێن کارەبێ.
رێژا کارەبا بەرھەمھاتی ژ لایێ وەزارەتا کارەبێ ب گۆرەیی پێدڤی و خواستا زێدە ب سەر چار پارێزگەھێن ھەرێمی دا ھاتیە بەلاڤکرن ب رەنگەکی ل ھەولێر 43%ێ کارەبا بەرھەم ھاتی پێ دھێتە دان و سلێمانی و ھەلەبچە 33%ێ کارەبا بەرھەم ھاتی پێ دھێتە دان و ل دھۆکێ ژی کێمترین رێژا کارەبا بەرھەم ھاتی پێ دھێتە دان کو 24% یە.
