زێده‌كرنا پارێ هاتنوچوونێ يا قانوونى يه؟
ئه‌ڤرۆ نيوز:
سەرۆکێ لیژنا ناڤخۆ ل پەرلەمانێ کوردستانێ ئاشکرا کر، زێدەکرنا سزایێن ھاتنوچوونێ ل سەر وەلاتیان کارەکێ نەقانوونی یە و ئەگەر بەغدا ژی بڕیارێ بدەت نابیت ھەرێم بجە بینیت.
ئەیوب عەبدولا، سەرۆکێ لیژنا ناڤخۆ یا پەرلەمانێ کوردستانێ بۆ رۆژناما ئەڤرۆ گۆت “وەزارەتا ناڤخۆیا حوکمەتا ھەرێما کوردستانێ دەست ب زێدەکرنا پارێ نووکرنا سالنامێن ترۆمبێلان و مۆلەتێن شوفێریێ کریە و ل سەر وەلاتیان ھاتیە زێدەکرن، بێگومان ئەڤ کارێ وەزارەتا ناڤخۆ چ ئەساسێن قانوونی بۆ نینە و تنێ وەزارەتێ ل نک خوە ئەڤ کارە کریە، زێدەکرنا سزا و پارێ کاروبارێن شوفێر و ترۆمبێلان ب تنێ د دەستھەلاتا پەرلەمانێ کوردستانێ دایە و ئەڤا نوکە زێدە ژ وەلاتیان وەردگرن بەرۆڤاژی قانوونێ یە، ئەگەر بھێت و بەغدا ژی بڕیارێ ل سەر ڤێ زێدەکرنێ بدەت، ئێکسەر ھەرێم بێی پەرلەمانی نەشێت بجە بینیت”.
ئەیوبی گۆت ژی “بەری نوکە لیژنە ھەموو دەمێن پێدڤی کۆمبوون، بەلێ ھێشتا ل دۆر ڤێ پرسێ کۆمبوون نەھاتیەکرن و بڕیارە لیژنا ناڤخۆ کۆمبوونەکێ ل دۆر زێدەکرنا پارەی ل وەزارەتا ناڤخۆ گرێدەت و سەرەدانا وەزارەتا ناڤخۆ بکەین بۆ ڤێ مەرەمێ، چونکو نابیت بێی پەرلەمانی پارێ زێدە ژ خەلکی بھێتە وەرگرتن، رۆژێن داھاتی دێ ئەڤان پرسیارا ژ وەزارەتا نافخۆیی کەین، نابیت قەیرانا دارایی ل سەر حسابا وەلاتیان بیت ئەڤە د دەمەکی دایە مووچێ فەرمانبەران ھاتیە کێمکرن”.
