زێرنگر سکالایێ ل سەر فرۆشکارێن زێرێ بەرازیلی دکەن
ئه‌ڤرۆ نيوز:
سەرۆکێ سەندیکا زێرنگران خوەیا دکەت، نابیت زێرێ بەرازیلی ب ناڤێ زێرێ بھێتە فروتن و بریارا ھەموو زێرنگران بۆ ھەموو خودانێن ئکسسواراتان ناڤێ زێری ل سەر دوکانێن خوە راکەن. ل دووڤ گۆتنا بریکارەکێ کرین و فرۆتنا زێرێ بەرازیلی کو ب رێژا 50% مە کارێ زێرنگران کێم کریە، لەورا زێرنگر ب چاڤەکێ نە جوان تەماشەی مە دکەن و ھەموو پێکول دکرن دوکانێن مە نەھێلن.
چەلەنگ عزەدین بریکارەکێ کرین و فرۆتنا زێرێ بەرازیلی یە ل بازارێ دھۆکێ گۆت: مە چو ئاریشە ل گەل زێرنگرا نینن، لێ زێرنگر ب چاڤەکێ نە جوان تەماشەی مە دکەن، چونکو مە کارێ وان کێم کریە و دیسان ل سەر دوکانێن مە نڤێسی بوو فرۆتنا زێرێ بەرازیلێ، بەلێ زێرنگر رازی نەبوون و پێکول کرن ناڤێ زێری ل سەر دوکانێن مە بھێتە ژێبرن، بەلێ نوکە ژی ھەموو خەلک دبێژن زێرێ بەرازیلی، دیسان ھەر زێرنگرا پێکول دکرن ڤان دوکانا نەھێلن، بەلێ کارێ مە کارەکێ سەربەستە و ھەتا نوکە نێزیکی 25 دوکانێن فرۆتنا ئکسسواراتا د بازارێ دھۆکێ دا ھەنە.
گۆت: خەلک دبێژنە ڤان ئکسسوارتا زێرێ بەرازیلی، لێ ئەو ب خوە سفرە و نەزێرە و خەلک گەلەک دھێن ڤان ئکسسواراتا دکرن و پتریا وان کچن، لێ ھندەک جارا ژی کور دھێن کرن بۆ دیاریا.
گۆت ژی: ب رێژا 50% مە کارێ زێرنگران کێم کریە و د ڤێ قەیرانێ دا خەلکی پی َچێنابیت زێری بکرن و پتریا ڤان ئکسسواراتا ل بەر زێری ھاتینە چێکرن و پتریا کچان دەمێ ھەڤژینیێ پێک دئینن ب تنێ کەمەرا زێری چێ دکەن و دھێنە دەڤ مە و لیرا چێ دکەن و ئەڤ ئکسسواراتە رەنگێ وێ ناچیت ئەگەر گولاڤێ لێ نەکەن.
محەمەد ئەمین ھەمان بریکارە ل بازارێن دوبەی کارێ کرین و فروتنا زێرێ بەرازیلی دکەت گۆت: پتریا وان کەسان دھێن قەستا مە دکەن کەسانێن ھەژارن، پێ چێنابیت زێرێ بکرن و ئەو ب خوە ژی دبێژن ئەڤە گەلەک وەکو زێری یە و ئەم زێری دکرین ژی مودێلا وی دچیت و ب خوسارەتی دفرۆشین، لێ ئەڤە یێ ئەرزانە و جوانە و کارێ مە ھەر یێ بەردەوامە و قەیرانا دارایی ژی چو کارتێکرن ل مە نەکریە و ھەر بکر دھێن ئکسسواراتا کرن، چونکو د ئەرزانن و
گۆت: بەری ھەیامەکێ زێرنگران گۆتە مە ئەم رازی نابین ناڤێ زێری ل سەر دوکانێن ھەوە بیت، چونکو ئەڤە نە زێرە، لەورا نەچاربووین ناڤێ زێری مە ل سەر دوکانێن خوە راکرن.
شێخ عەبدولسلام سەرۆکێ سەندیکا زێرنگران ل دور بابەتی گۆت: نابیت زێرێ بەرازیلی ب ناڤێ زێری بھێتە فروتن، د بنیات دا ئەو نەزێرە، بەلکو ئکسسواراتە نە زێرە و یاسایێ قەدەغەکریە و نابیت تەشقلە ل خەلکی بھێنەکرن و ب چو رەنگەکی خودانێن جھێن ئکسسواراتا کارتێکرن ل کارێ مە نەکریە و مە پەیوەندی ب خەلکی ڤە نینە کو خەلک ب تنێ بچن و قەستا وان بکەن.
گۆت ژی: ھەموو ئەو دوکانێن ل سەر دوکانێن خوە ناڤێ زێری چێکرین ھەموویان ناڤێ زێری ژێبریە و ئەگەر ئەو ناڤێ زێری ژێ نەبەن ئاسایش وان کەسا دێ رەوانەی دادگەھێ کەت و مە گۆتیە وان کەسان ژی ل سەر دوکانێن خوە چێکەن ئکسسوارات، نەکو زێر و مە چو پەیوەندی ب وان ڤە نینە، نە ژ دوور و نە ژ نێزیک، بەلێ نابیت ڤان ئکسسواراتا ب ناڤێ زێری بفروشن.