زەعیم عەلی بۆ ئەڤرۆ: دو تیروریستێن ل رەبیعە ھاتینە کوشتن کورد بوون
ئەڤرۆ، ڤەگێر سەعدوللا:
د ھەڤپەیڤینەکێ دا ل گەل رۆژناما ئەڤرۆ زەعیم عەلی بەرپرسێ میحورەێ رۆژھەلات و رۆژاڤایێ دیجلە و ئەندامێ مەکتەبا سیاسیا پارتی دیموکراتی کوردستان کو بەری دو رۆژان د شەرێ رەبیعە دا بریندار بوو ل دور وێ ھێرشا داعش بۆ سەر پێشمەرگەی گۆت: “دەمژمێر ٦ و نیڤێ سپێدێ وان ھێرش کرە سەر خالێن مە ل رەبیعە، لێ پێشمەرگان بەرەڤانیەکا باش کر و ئەم ژی وەکو فەرماندێن وێ دەڤەرێ چووینە ھاریکاریا وان. نێزیکی دەمژمێر ١١ وان ب نارنجوکا و دەبانجان ھێرش کرە سەر مە و ساچمەکا نارنجوکێ ب ستویێ من کەفت و برین پیچەکێ یا کوور بوو ھەتا کو ئێڤاری شەر تمام بووی گەلەک خوین ژێ ھات، ب شەڤێ دەمێ ئەم زڤرینە ڤە، دکتورەکێ جەراح ھات پەنج بۆ من دانا و ساچمە ئینا دەرێ و نوکە بارودوخێ من گەلەک یێ باش و جێگیرە”.
زەعیم عەلی دیار کر کو ئەو شەر گەلەک یێ دژوار بوو و وان پێزانین ھەبوون کو ئەڤە ھەیڤەک زێدەترە داعش خو بۆ ڤان جورە ھێرشان ئامادە دکەن و ئارمانجا وان ئەو بوو کو رەبیعە بگرن و داگیر بکەن.
ل گور ئاخفتنێن زەعیک عەلی داعش ب چەند ھەمەر و دوشکەیێن ٢٣ملم و ١٢.٥٠ ملم ھێرش ئینان و دڤیا ئێک ژ چەپەران خەرق بکەن و ھەکە خەرق کر بوو دا ھێرشێن دی ب دووڤ دا ھێن و دا شێن چەند دەڤەرەکا گرن، لێ پێشمەرگان نەھێلا زێدەتر بھێن.
د پشکەکا دی یا ئاخفتنێن خو دا زەعیم عەلی گۆت: “دەستخوشیێ ل فرۆکەیێن ھەڤپەیمانان دکەین کو زور ھاریکاریا مە کر و نەھێلا ھێزێن زێدەتر بۆ ھاریکاریا داعش بھێن و د ھەمان دەم دا سەرکردایەتیا مە راسپاردە د دانە مە و ھەموو ئەو ئەو پێنگاڤێن پێدڤیی بوون ھاتنە ھاڤێتن و مە سەرکەفتنەکا گەلەک باش بدەستڤە ئینا”.
ل دور وێ یەکێ کا بۆچی داعش پتر ھێرشان دکەتە سەر رەبیعە، زەعیم عەلی گۆت: “رەبیعە دەڤەرەکا ھەستیارە و خالەکا سنوری یە کو بتنێ ١٠ دەقان ژ باژێرکێ تل کوچەر یێ سوریێ دوورە و ھێلا شەمەندەفرێ لێ بوو کو ژ وی سنوری بەر ب سوریا و ھەتا تورکیا دچوو و وەکو ئیبراھیم خەلیل دەروازەیەکێ گرنگە و ھەروەسا ھەکە پێشمەرگەی بڤێت بەر ب موسل و شنگال و تلعفەر بچیت دشیاندایە مفا ژ رەبیعە بھێتە وەرگرتن. ژلایەکێ دی ڤە ژی ھەکە ئەو رەبیعە بگرن، ئانکو ئەو دێ دەستێ مەیێ راستێ گرن کو دبیتە سنورێ سوریێ و وی وەختێ دێ بەرەیەکێ دی یێ شەری بۆ مە ڤە بیت و دێ بۆ مە بنە دو بەرەیێن شەری. ھەروەسا رەبیعە ناحیەکا زیندیە و چەندین گوند پێڤە د گرێدایی نە، لەوما وان دڤێت وێ دەڤەرێ بگرن دا ژ وێری بەر ب زوومار بھێن یان پێنگاڤێن دی ب ھاڤێژن”.
زەعیم عەلی بەحسێ وێ چەندێ کر کو ورەیێن داعش وەکی بەرێ نەماینە، ژ بەر کو پشتی ٣ی ھەیڤا ھەشت ئەو ل گەلەک دەڤەران بەر ب پێش ھاتبوون، پاشی پێشمەرگان گەلەک دەڤەر ژ وان رزگار کرن و گەلەک دەبابە و ھەمەر ژ وان وەرگرتن، ل دەستپێکێ پێشمەرگەی سەدێ موسل ژ وان رزگار کر پاشی عەین زالە کو ژلایێ ئابووری ڤە دەڤەرەکا نەفتیا گەلەک بەرکەفتیە، پاشان پرۆژی جەزیرە کو ژ سەدێ موسل دھێت و پرۆژەیەکێ ئابووری و کشتوکالی یێ بھێزە و ئاڤ د دا وان ھەموو دەڤەران و ھەروەسا کەھرەب د دا موسل و چەند دەڤەرەکێن دی کو ئەو ژی دەڤەرەکا ستراتیجی بوو، ب ھەمان رەنگ زوممار کو دبیتە دەڤەرەکا ستراتیجی و تلعفەر و رەبیعە و سەدێ موسل پێکڤە گرێ د دەت.
ل دور وێ یەکێ کو ل شەرێ داعش دا گەلەک جاران فەرماندێن پێشمەرگەی شەھید و بریندار دبن، کا ئەڤە زێدەتر بۆ چ دزڤریت، زەعیم عەلی گۆت: “گەلەک جاران تەکتیکێن لەشکری یێن ھەین و ئەو تشتێ فەرماندە ژ پێشمەرگەی دخوازیت وەکو پێدڤی ناھێتە بجھئینان بۆ نموونە وەکو لێدانا خالەکا ستراتیجی یان ھندەک جاران ئارمانجەک ئاسێ دبیت و لێدانا ئارپێچیەکێ دڤێتن، د وان حالەتان دا پێدڤیە فەرماندە ب خو پشکدار بیت، ژ بەر کو ئەو پتر خودان سەربورە و سەرکردەیە و پێدڤیە داخل بیت و وێ خالێ ئێکلا کەت یا کو بزەحمەتە بھێتە ئێکلاکرن و پێدڤیە فەرماندە داخل بیت دا شەری ئێکلا بکەت و دوھی ژی ب وی رەنگی بوو دەمێ ئەم داخل بووین، ھەر چەندە بریندار ژی بووین، لێ مە ئێکلاکر و ب دووماھی ئینا”.
زەعیم عەلی بەحسێ وێ یەکێ کر کو ئەو قوناغ ب قوناغ دەڤەران ژ داعش رزگار دکەن و گۆت: “ھەکە تە بڤێت پێشرەویێ بکەی بۆ دەڤەرەکێ و دووراتیا وێ گەلەک بیت پێدڤیە ببیتە قوناغ ب قوناغ، ژ بەر کو ھەکە وەسا نەبیت دێ یا ب زەحمەت بیت ژ بەر کو تە ھێزەکا زێدە و ھەروەسا پشتەڤانیەکا زێدە دڤێت، لەوما پێدڤیە پێنگاڤ پێنگاڤ بیت و سەنگەرێن خو بھێز بکەی پاشان ھێرشێ بکەی و ئەف رێکە ئابووری ترە و دێ پتر ورەییا پێشمەرگان ژی بلند بیت”.
زەعیم عەلی ئەو یەک ژی دیار کر کو رەبیعە و زومار دێ بنە رێخوشکەر کو شنگال بھێتە ئازاد کرن و گۆت: “ رەبیعە و زومار وەکو جھێ پێیەکێ نە کو بشێی پێ خو لێ بدانی و پێنگاڤەکا دی بەر ب پێش بچی. بۆ رزگارکرنا شنگالێ ئەو دێ بۆ سەرکردایەتیێ و پلانێن مینیت و ئەڤە پێنگاڤێن گەلەک باش بوون کو بشێین پێنگاڤەکا دی ب ھاڤێژین”.
ل دور ھژمارا کوشتیێن داعش د وی شەری دا، زەعیم عەلی گۆت: “٢٢ تەرمێن داعش کەفت بوونە بەر دەستێ مە و یێن ھاتینە ڤیدیو و وێنە کرن ژلایێ پێشمەرگا و راگەھاندنێ ڤە و گەلەک جاران فرۆکان ل ھندەک دەڤەران ل وان دا و ژێ د کوشتن کو ئەم نەدشیاین بچینە وان جھان و گەلەک ژی نەھاتینە دیتن و پێدڤیە پتر ل دووڤ بگەرن ل ھەموو وان جھان ھەتا ژمارا راسەقینە یا کوشتیێن وان بھێتە زانین. لێ ل دووڤ پێزانینێن مە کوشتیێن وان ھەتا ٤٠ کەسان بوون و ھەلبەت بریندارێن وان ژی پتر بوون ھەروەسا ٥ کەسان ژ وان بزاڤ دکرن خو ب مە ڤە پەقینن، لێ دەمێ پێشمەرگەی ل وان دا د گەل ھندێ وان ژی خو د پەقاند”.
د پشکەکا دی یا ئاخفتنێن خو دا زەعیم عەلی گۆت: “ژمارا وان کەسێن ھێرش کری د ناڤبەرا ١٥٠ بۆ ٢٠٠ کەسان بوون، ژ بەر کو ب ١١ پیکئاب ھاتبوون و ٦ دوشکە و ٤ ھەمەر کو وان ژی دوشکە ل سەر بوون ھەروەسا چەند بیکەیسی و ھاون ل گەل بوون ئەڤە ژبلی ھێزا وان یا پشتەڤانیێ”.
زەعیم عەلی ئەو یەک ژی دیار کر کو چەند ھەمەرەک و دوشکە پیکابێن وان و چەندین چەکێن دی یێن داعش کەفتنە بەر دەستێ پێشمەرگەی و ھەروەسا چەند قایشێن خو پێ پەقاندنێ ژی.
ل دور رەگەزێن وان تیروریستێن د ھێرشا دوھی دا پشکداری کری، زەعیم عەلی گۆت: “ئەوێن مە کوشتین ئێک ژ وان پارێ ئەلمانی و کاغەزێن ئەلمانی ڤێ بوون و ئێکێ روسی بوو دەفتەرەک ل گەل بوو کو دیار بوو خو فێری عەرەبی دکر و ھەروەسا چپچانی و تورکی و یەمەنی ل گەل دا بوون، ب تنێ دو ژ وان کوردێن خەلکێ گرڤر بوون یێن دەڤەرا زوممار یێن دی ھەموو بیانی بوون”.
د دووماھیا ئاخفتنێ، خو دا زەعیم عەلی گۆت: “داعش یا بەر ب نەمانێ دچیت و ورەیێن پێشمەرگەی گەلەک دبلندن لەوما داعش پەنایێ دبەتە بەر پرۆپاگندا و بەلاڤکرنا نووچەیێن دوور ژ راستیێ و ئێک ژ پرۆپاگندێن وان ل دور منە، لێ رەوشا من گەلەک یا جێگیرە. داخوازێ ژ حکوومەتا عیراقێ ژی دکەم کو بھێن پێکڤە کار بکەین دا داعش ژ ناڤ ببەین و ھەروەسا داخوازێ ژ مەحافلێن دەولی دکەم کو د ھاریکار بن و پتر چەکی و تەقەمەنیان بۆ مە بھنێرن دا بشێین ب زووترین دەم ڤان داعشا ژ ناڤ ببەین”.
