سائيرۆن: به‌رنامێ حوكمه‌تێ ژ پۆستێن سه‌رۆكاتيێ گرنگتره
ئه‌ڤرۆ نيوز، فاتما مزوورى:
رائید فه‌همی سكرتێرێ حیزبا شیوعی یا عيراقێ و سه‌ركرده د هه‌ڤپه‌یمانیا سائیرون دا ره‌ت كر كو سێ پۆستێن سه‌رۆكاتیێ ته‌وه‌رێ سه‌ره‌كى یێ گفتگۆ و لێك تێگه‌هشتنا ئالیێن سیاسی بن، ل دۆر پێكئانینا مه‌زنترین كوتله‌یا په‌رله‌مانى.
دا خویاكرن ژی كو هه‌تا نها به‌حسا وێ یه‌كێ نه‌كرنه كو دێ وان پۆستان وه‌رگرن یان نه و دبيت كو هه‌ر كوتله‌یه‌كێ به‌ربژارێن خوه هه‌بن.
ئاماژه ب وێ یه‌كێ ژی كر گفتوگو به‌حسا وێ یه‌كێ دكه‌ن كو میكانیزما پێك ئينانا حوكمه‌تێ ب شێوه‌یه‌كی جودایه دگه‌ل یا پێشتر.
وی سه‌ركرده‌یی سائیرون زێده‌تر گۆت: “پرۆگرامێ حوكمه‌تێ د سه‌رى دایه نه‌ك هه‌ر سێ پۆستێن سه‌رۆكایه‌تیێ”.
هه‌لبژارتنێن په‌رله‌مانى 12ى ڤێ مه‌هێ برێڤه چوون و تێدا هه‌ڤپه‌یمانیا سائیرون یا موقته‌دا سه‌در د پله‌یا یه‌كه‌م و هه‌ڤپه‌یمانیا فه‌تح یا هادی عامری د پله‌یا دووه‌م و هه‌ڤپه‌یمانیا نه‌سر یا حه‌یده‌ر عه‌بادی د پله‌یا سییه‌م دا هاتن.
هه‌ڤده‌م به‌شه‌ك ژ قه‌واره و كه‌سایه‌تى ب ئه‌نجاما داویێ یا هه‌لبژارتنان نه‌رازیبوون كو د ژمارتن و جوداكرنا ده‌نگان دا سیسته‌ما ئه‌لیكترۆنی هات بكار ئانین.
ڤێ یه‌كێ ژی وه‌ها كر كو ناكوكیێن مه‌زن ل دۆر ئه‌نجامان دروست ببن و ئه‌وێن نه‌رازی داخوازا ژمارتنا ده‌نگان یان هه‌لوه‌شاندنا به‌شه‌ك ژ ئه‌نجامان بكه‌ن.
