ساخلەمیا دھۆکێ: تیمێن مە یێن گەرۆک بەردەوام دێ د ناڤ سەیرانیان دا بن
ئەڤرۆ نیوز:
رێڤەبەریا گشتیا سەخلەمیێ ل پارێزگەھا دھۆکێ ب ھەلکەفتا ھاتنا جەژنا نەورۆزێ، سەر سالا کوردی بۆ سەیرانیان چەندین رێنما بەلاڤکرینە ژ بوو ساخلەمیا گیانێ وەلاتیان و ئەڤێن ل خوارێ ژی ھندەک ژ وان رێنمایانە:
١- ھەمی پشکێن تەنگاڤیان ل نەخوشخانێن گشتی ٢٤ دەمژمێرا دێ د خزمەتا وەدابن.
٢- ل سەر رێکێن سەرەکی بنگەھێن ساخلەمیێ دێ دڤەکری بن و ل ناڤ جھێن سەیرانان ژی تیمێن ساخلەمیێ دێ خزمەتا وە کەن.
٣- خزمەتا ١٢٢ بۆ دەمێ ٢٤ دەمژمێرا د کاری دایە و ھەر روودانەک پەیداببیت ئێکسەر پەیوەندیێ ل گەل بکەن و بێ گیروبوون دێ د ھەوارا وە ھێن.
٤- شەش تیمێن زێرەڤانیا ساخلەمیێ ل جھێن گشتی دێ دکاری دابن و ب دیتنا ھەر کەرستەکێ گومانلێکری یێ خوارنێ ئاگەھدار بکەن.
٥- بەری دەست ب خارنێ بکەی و پشتی ژ خارنێ ب دووماھی دھێی، دەستێن خو باش ب ئاڤێ و سابونێ بشوو.
٦- خوارنێ باش ب کەلینە و خوارنا ھەلگرتی گەرم بکە بەری جارەکا دی بھێتە خوارن.
٧- ئاڤا پاقژ بۆ ڤەخوارنێ و شووشتنا زەرزەواتی و فێقی ب کاربینە.
٨- ھەکە یێ پشت راست نەبی ژ ئاڤا ڤەخوارنێ، ئاڤێ بۆ دەمێ ٥ دەقیقا بکەلینە.
٩- فێقی و زەرزەواتی بۆ دەمێ ١٠ دەقیقا دناڤ ئاڤەخوێ دا بھێلە و بەری خوارنا وان ب ئاڤەکا پاقژ بشوو.
١٠- دەمێ تووشی زکچوونەکا دژوار دبی، ب زووترین دەم سەرەدانا نوژداری بکە.
