ساخلەمیا زاخۆ ئامارێن رۆژێن جەژنێ راگەهاندن
بەرپرسێ ڕاگەهاندنا رێڤەبەریا گشتیا ساخلەمیا ئیدارا سەربخوە یا زاخۆ دیار كر، د رۆژێن جەژنا رەمەزانێ دا 15 روودانێن هاتنوچوونێ هاتینە تۆماركرن و هەشت حالەتێن سۆتنا وەلاتیان پەیدابووینە و چو مەترسی ل سەر ژیانا وان نەبوویە و 32 حالەتێن شكەستن و 292 حالەتێن بێهنتەنگیێ و شەش كەس تووشی جەلتا مەژی بووینە و هندەك كەس تووشی جەلتا دلی بووینە و 168 زارۆك ل نەخۆشخانەیان هاتینە نڤاندن و چارەسەركرن.
ئەمیر عەلی، بەرپرسێ ڕاگەهاندنا رێڤەبەریا گشتیا ساخلەمیا ئیدارا سەربخوە یا زاخۆ راگەهاند، دو خوارنگەهـ هاتینە سزادان و پێنج كەسان د رۆژێن جەژنا رەمەزانێ دا گیانی خوە ژ ئەگەرێ نەخۆشیان ژ دەستدایە و گۆت: «هەمی نەخۆشخانەیێن زاخۆ 24 دەمژمێران د ئامادەباشیێ دا بوون و 14 نەخۆش ژ زاخۆ بۆ پارێزگەها دهۆكێ هاتینە رەوانەكرن و تیشك و سونەر و میفراس بۆ هەژمارەكا زۆر یا نەخۆشان هاتینە گرتن و هزار و 90 پشكنینێن هەمەجۆر بۆ نەخۆشان هاتینە ئەنجامدان و 67 بتلێن خوینێ بۆ نەخۆشان هاتینە دان».
ئاشكرا ژی كر، 58 زارۆك ب رێكێن سروشتی ژ دایكبووینە و 67 ئافرەت ل نەخۆشخانێ هاتینە نڤاندن و چەندین خزمەت بۆ نەخۆشان هاتینە پێشكیشكرن.
