ساخلەمیێ ھەموو بەرھەڤێ بۆ پێشوازیا بریندارێن قامشلۆ کربوون
ئه‌ڤرۆ نيوز:
بەرپرسێ پشکا راگەھاندنێ ل رێڤەبەریا گشتیا ساخلەمیا پارێزگەھا دھۆکێ دیار کر سەر راسپاردا سەرۆک بارزانێ سەرۆکێ ھەرێما کوردستانێ، ساخلەمیا دھۆکێ ھەموو نەخۆشخانێن دھۆکێ و زاخۆ ئێخستنە د ئامادە باشیێ دا بۆ پێشوازیا بریندارێن قامشلو و سێ تێمێن ھاوار ھاتنی ژێ بۆ سنۆری ھاتنە رەوانەکرن.
حەمزە رەزیکی بەرپرسی پشکا راگەھاندنێ ل رێڤەبەریا گشتیا ساخلەمیا دھۆکێ دیار کرسێ تێمێن ھاوار ھاتنی بۆ خالا سنۆری پێشابۆر ھاتنە رەوانەکرن بۆ پێشوازیا لێقەومایێن قامشلۆ و ساخلەمیا دھۆکێ یا بەرھەڤە ل ھەر دەڤەرەکا بیت تێمێن خوە دووڤ راسپاردە و بریارا سەرۆک بارزانی رەوانە بکەت بۆ خزمەتکرنا خەلکێ کوردستانی و چارەسەرکرنا برینداران و ھاریکاریێن دەرمانێ و پێدڤیێن تەندروستی د بەرھەڤن ھەکە قامشلۆ پێدڤی بیت دێ بۆ ھێنە رەوانەکرن.
رەزیکی گۆتژی گەلەک جاران ساخلەمیا دھۆکێ ھاریکاریا رۆژئاڤایێ کوردستانێ کریە ھەر دەمێ پێدڤی بن ئەم بەرھەڤین ھاریکاریا نەخۆشخانێن وان بکەین و دەرگەھێ نەخۆشخانێن دھۆکێ ژی د ڤەکرینە بۆ ڤەحەواندن و خزمەتکرنا وەلاتیێن مە ل رۆژئاڤایێ کوردستانێ.