سالانە دھۆکێ شیانێن چێکرنا چەند فلمان ھەنە؟
ئەڤرۆ:
چێکرنا فلمێن سینەمایی بۆ چ ئارمانجن، بۆ ڤیستەڤالان دھێنە چێکرن یان بۆ وەلاتیان؟، بەرپەرێ ھونەری ل سەر ڤێ مژارێ چەندین بۆچوونێن بسپۆرێن گرێدایی ب ھونەرێ ناڤبری ڤە وەرگرتینە.
رێڤەبەرێ ھونەرێ سینەمایێ ل پارێزگەھا دھۆکێ، عادل عبدولرەحمان، گۆت: ئەم فلمان بۆ ڤیستەڤالان ژی چێدکەین، ھەروەسا بۆ خەلکی ژی، بۆ ڤیستەڤالا مە مەرەمێن خوە پێ ھەنە، وەلاتێ خوە پێ ب دەینە نیاسین، وبێژینە خەلکەکی مەژی سینەما ھەیە، مەژی کارو ھونەرمەندێن سینەمایی ھەنە، ل گەل وەلاتێن پێشکەفتی ب ریڤە دچین، فلمان بۆ خەلکی چێدکەین کو خەلک ژی ڤان فلمان ببینت، ژ نەبوونا ھولێن سینەمایێ نەشێین خەلکی تێر بکەین بۆ دیتنا فلمێن سینەمای.
عادلی گۆتژی: سالانە دەمێ بۆدجە دھێت و لدووڤ وی پارەی کاردکەین، نەشێم بێژم دێ چەند فلمان چێ کەین، گرێدای بۆدجێ یە، وئەگەر بۆدجەکا باش بیت دێ شێین دو فلمێمن درێژچێکەین، نەشێین فلمان ژ بۆدجا خوە چێکەین، نەشێین ئێک فلم بەرھەم بینین، بتنێ فلمێن ھەڤپشک ل گەل دەرڤەی کوردستانێ چێدکەین.
رێڤەبەرێ ھونەری یێ سینەمایێ ھێشتا ژی گۆت: حەزدکەم سینەما ل سەرانسەری کوردستانێ پێش بکەڤیت، سینەما کارێن مە رۆلێن خوە ببینن دناڤ سینەماکارێن جیھانی دا، چونکو سینەما زمانێ ئێکێ یە ل دونیایێ، ھونەرمەندی رێزا خوە یا ھەی ل دونیایێ و ئەگەر سەرۆک وەزیرەک بچیتە دەرڤەی وەلاتی دبیت کەس نەزانیت، لێ ئەگەر سینەماکارەک بچیت، دبیت گەلەک کەس بچنە پێشوازیێ.
دەرھێنەر وەلید تاھر، گۆت: پتریا چیرۆکێن سینەمای یێن مە گرێدای ڤان کاودانانە و دووماھی فلم من چێکری دیرۆکی بوو دبیت فلمێ بھێت ل سەرکاودانێن نوکە بیت، سالانە دشێین دو فلمان چێ کەین، ئەگەر فلم دکورت دبن ھەتا دۆرێن حەفت فلمان دشێین چێکەین، وەلیدی گۆت: حەزدکەم سینەما پتر وەک تایبەت مەندیێ بیت ھەتا نھو گەلەک کەس ھەنە دو کارا تا سێ کارا دکەن و ئەگەر وەک دەرھێنەر کارێ خوە بکەن کەسێن کارگێری کارێ کارگێری بکەن و کەسێن کارێ سیناریۆیێ دکەن بلا کارێ سیناریۆیێ بکەن.
وەلیدی گۆت ژی : نوکە فلمان چێدکەین بۆ ڤیستەڤالان و ھیڤی دکەم سینەما ژ چارچووڤێ ناڤخوەیی دەربکەڤیت و بەر ب جیھانگێریێ بچیت و پێکولا بکەین سپونسەرا بۆ خوە ژدەرڤە بینین.
سینەماکار بینا قەرداغی گۆت: ھەتا نوکە چ فلمێن وەسا نەھاتینە چێکرن کو لدووڤ دیرۆکا دھوکێ بن و ئاگەە ژێ نینە کو ھاتبنە چێکرن، ھەتا نوکە چ ھولێن سینەمایی ل دھۆکێ نەبووینە کو فلمێن سینەمایی بھێنە نیشاندان، ھەولدان یێن ھەین، ئەڤ فلمە دڤیستەڤالاندا دھێنە نیشاندان ل دھوکێ ب تایبەت وەکو ڤیستەڤالا دھوک یانیڤ دەولەتی کو بەشەکێ مەزن فلمێن کوردی ب خوە ڤە دگریت دھێنە نیشاندان بۆ خەلکی.
بینایێ ھێشتاژی گۆت: ئەڤ فلمێن سینەمایی دھێنە چێکرن دڤێت خەلک ببین و ژھەموو یان گرنگ ترە، دبینم ژسینەمایێن بازرگانی ئەوێن ڤەدبن ل کوردستانێ ئەگەر ئەو د پرۆگرامێ خوە دا ھەیڤێ جارەکێ فلمەکێ کوردی نمایش بکەن بۆ خەلکی دێ گەلەک باش و سودمەند بیت چونکو ئەڤ فلمێن دھێنە چێکرن ھەموو بابەتێن گەلەک گرنگ ب خوە ڤە دگرن و ژخەلکی نە بۆخەلکی نە گۆت: گەلەک فلم ھەنە دەرھێنەرێن مەزن دھێنە دھوکێ فلمێن گەلەک باش چێ دکەن دجیھانێ دا خەلاتێ مەزن وەردگرن و ئەو خەلکێ دھۆکێ ئەوێن دناڤدا پشکدار دمالێن وا دا و دجێن وان دا ھاتینە وینەکرن ڤی فلمی نابینن دبینم ئەڤە غەدرەکا مەزنە ل وان دھێتە کرن
ھەروەسا بینایی گۆت: سەپاندنا یاسایەکێ ل سەر وان ھولێن سینەمایێ بەھرا فلمێن کوردی بدەنێ وئەڤ چەندە ژی ئەرکەکە دڤێت لایەنەک پێ رابیت.
