سالا بۆرى ژمارا قوربانيان ژ يا روودانان زێده‌تر بوو

ئه‌ڤرۆ نيوز، نيوار محه‌مه‌د سه‌ليم:

رێڤه‌به‌ريا هاتنوچوونا پارێزگه‌ها دهۆكێ ئامارا سالا بۆرى راگه‌هاند و ئاشكه‌را كر كو ژ سه‌رجه‌مێ 1139 روودانان 151 كه‌سان گيانێ خوه‌ ژ ده‌ست دايه‌ و 1746 كه‌س ژى بريندار بووينه‌.

موقه‌دمێ مافپه‌روه‌ر، ئازاد تاها، به‌رپرسێ په‌يوه‌ندى و راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ ئه‌ڤرۆ د كۆنگره‌كێ رۆژنامه‌ڤانى دا راگه‌هاند كو ل سالا بۆرى ل سه‌رانسه‌رى پارێزگه‌ها دهۆكێ هزار و 139 روودانێن هاتنوچوونێ هاتينه‌ تۆماركرن كو 777 لێكدان و 166 وه‌رگه‌ريان و 197 لێدان و پێنج ژى سۆتن بووينه‌.

موقه‌دمێ مافپه‌روه‌ر گۆت: “د ڤان روودانان دا، 151 كه‌سان گيانێ خوه‌ ژ ده‌ست دايه‌ كو 47 مێ بووينه‌ و 104 نێر و هزار و 746 ژى بريندار بووينه‌ كو ژ وان ژى 449 مێ بووينه‌ و ئه‌ڤێن دى نێر”.

وه‌كو هه‌ڤبه‌ركى ل گه‌ل سالا بۆرى ژمارا روودان و قوربانيان باشتر بوويه‌ ب ره‌نگه‌كى ل سالا بۆرى هزار و 180 روودان هاتبوونه‌ تۆماركرن و 194 كه‌سان گيانێ خوه‌ ژ ده‌ست دابوو و دو هزار و 725 كه‌س ژى بريندار ببوون.

به‌رپرسێ په‌يوه‌ندى و راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ دا زانين ژى كو وه‌كو هه‌ڤبه‌ركى ل گه‌ل سالا بۆرى 11 هزار و 656 ترۆمبێل هاتينه‌ تۆماركرن و هزار و 24 ترۆمبێل ژى هاتينه‌ ژناڤبرن.

کۆمێنتا تە