سالا 2016 سالا تێکچوونا پەیوەندیێن پارتێن کوردی بوو
ئه‌ڤرۆ نيوز:
سالا 2016 یا دەربازدبیت و ب سالا دووبوونا پارتێن کوردی و تێکچوونا کاودانێن دارایی و ئابووری ھەرێمێ دھێتەنافکرن، چاڤدێر و ئالیێن سیاسی بۆچوونێن جودا ھەنە و دیسا پێشبینی بۆ سالا نوو ھەنە.
غیاسەدین نەقشەبەندی چاڤدێرێ سیاسی گۆت: سالا 2016 نەکو نەخوشترین سال بوو ژ بەر کو پارتێن کوردی نە ئێک بوون، ھەروەسا نە ژ بەر وێ یەکێ یە کو پارت ژ ھەڤد و د جدانە، پارتێن جودا واتە ھزرو بیرێن جودا ئاسایە تەڤگەرا ھزرۆبیران ئێک بیت، یادی نەگرفتە ئەگەر بجوداھی رێکا خەباتا خوە و نەخشا وێ بجوداھی ببینن، لەێ یا دێمەنێ سایسی ل کوردستانێ یێ جودایە، نە پارتێن سیاسی سیاسنە و نە بۆچوونێن لوجیکی ھەنە، نە حوکمەت حکومەتە و نە ئوپوزیسیون، ھەموو دیمەن تەڤلی ھەڤبووینە.
نەقشەبەندی ئەو ژی گۆت: شاشیا مەزنا پارتێن دەستھەلادار بزاڤا چێکرنا حوکمەتا بنگەە فراوان و نەھێلانا ئوپزسیوونەکا راستەڤەکر و چاڤلێکەریەکا فاشل ژبۆ شێوازا حکمی ل بەغدا و نەچێدبووئەڤە ھاتباکرن چونکی نەھێلانا ئوپوزسیونڵا واتا ھندێ د دەت کو حوکمەت دڤێت ھەموو لایەنان ب خەلاتێن دەست ھەلاتێ رازی بکەت، ئەڤە چێنبیا و چ حوکمەت نەشێن ھەموو کەسان رازی بکەن.
غیاسەدین نەقشەبەندی ئەو ژی گۆت: سالا د2016 نە سالا سەرھلدانا قەیرانانە مە چ قەیران نین، پێناسا قەیرانێ ئەوە کو روودانەک ئلن ھندەک روودان بقەومن و دەستلاھەتێ چ دەست ھەلات بەرامبەر نەبن و نەشێت چ بکەت چونکی تشتەکێ بدەر ژ ئیرادا وێ، ئەڤا ئەم دبینین ل کوردستانێ تنێ سەرھلدانا ئەنجامێن شاشە و چەوتیێن بەری چەند سالانە لەوما ئەم نەشیێن بێژینێ قەیران، ئەگەر تەڤگەرا ھزرکرنا حزبان بەکڤیتە دخزمەتا دروشمێن خەباتا رزگاریخوازا کوردستانێ و دروستکرنا دەولەتا سەربەخۆ بلا جوداھی ھەبن، جوداھی نە تشتەکێ خرابە و ئەگەر دخزمەتا ڤێ ئارمانجێدابیت.
چاڤیدَرێ سیاسی ئەو ژی گۆت: ژبیرا مە نەچیت سالا 2016 سالا تێکشکاندنا داعش بوو و ئەو داعشا کو سودو مفایێن وێ بۆ مللەتێ کورد ژ خرابیان پتر بوون، پێشمەرگە کرە ھێزەکا ناڤنەتەوەیی و دیمەنێ کوردان ل جیھانێ تەیساند لەواژی دەولەتێن ئەقللیمی دەستێوەردانا خوە پرتر لێکر و کارتێکرن ل سەر ھندەک حزبان کر کو بگەھنە ئاستێ ھندێ دژی چێکرنا دەولەتا کوردی راوەستن و بگۆتن و رەفتار و نەھێلن دروشمێ دەولەتێ لژێر فشارا لاوازیا ئابووری فورمولەبیت.
غازی سەعید ئەندامێ مەکتەبا سیاسی یا ئێکگرتوویا ئیسلامی ل کوردستانێ گۆت: سالا 2016 سالەکا نەباش بوو ژ روویێ سیاسی و ئابووری و سالەکا پتر قەیران بوو و سالەکا نە ئارام بوو چونکە ھێشتا مللەتێ مە یا دشەری دا ل گەل چەکدارێن تیرۆرستێن داعش و سالەکا خراب و ھەم سیاسی و ھەم ئابووری و ھەم ئێمناھی و پەککەفتنا پەرلەمانێ کوردستانێ.
غازی سەعید ئەو ژی گۆت: پێشبینی دکەین سالا 2017 سالەکا باشتر بیت ژ ھەموو روویەکی ڤە و بزاڤێن پارتێن کوردستانێ بۆ نێزیکیبوونا ئێک دو و چارەسەکرنا قەیرانا سیاسی ل کوردستانێ و دیسا ژ روویێ دارایی ژی ڤە پێشبینی دھێنەکرن رەوشا ئابووری ھەرێما کوردستانێ بەر ب باشبوونێ ڤە بچیت و تایبەت پشتی ئوپێکێ بریار ل سەر کێمبوونا پەترۆلێ دا ل بازارێن جیھانی.
غازی سەعید ئەو ژی گۆت: کومبوونێن پارتێن سیاسی ل گەل ئێک ئاسودەکێ گەش و روون دیار دکەت کو رەوش بەر ب باشبوونێ ڤە بچیت و پشتی سەرێ سالێ دێ کومبوون ل سەر پرۆژەکی ھێنەکرن و چارەسەرکرنا ڤێ قەیرانێ، ھیڤیەک ھەیە کو پارتێن باشورێ کوردستانێ ل نێزیکبوون ھەیە بۆ چارەسەکرنا کێشان و گەھشتن ب رێکەفتنەکێ و خوشکرنا ژین و ژیارا وەلاتیان.
غازی سەعید ئەو ژی گۆت: ھەموو پارتێن سیاسی دێ کومبوونێ کەن چونکە ھندەک کێشە ھەنە گرێداینە ب ھەموو پارتان ڤە وەک کێشا سەرۆکاتیا ھەرێما کوردستانێ دەستوورە و پێشبینی دکەین کومبوونێن پتر ژ دو قولی بھێنە ئەنجامدان.
دیندار نەجمان چاڤدێرێ سیاسی گۆت: راستە سالا 2016 سالا تێکچوونا پەیوەندیان بوویە لێ سالا سەرکەفتنا پێشمەرگێ قەھرەمان ژی بوویە ل سەر تیرۆرستێن داعش، لێ قەیرانێن سیاسی ژی ھەتا نوکە بەردەوامن و قەیرانا دارایی ژی ئەو ژی جھێ دل نە رحەتیا مەیە و قەیرانا سیاسی ھەرێما کوردستانێ کارتێکرن ل سەر بریارەکا سیاسی کریە کو ریفراندومە و دەستیشانکرنا چارەنڤیسێ ھەرێما کوردستانێ راگەھاندنا دەولەتێ بێ گومان ئەف قەیرانا سیاسی دبیت ئەڤ پرۆژە گیرۆکربیت، چونکە بریارەکا بڤی رەنگی پێدڤی ب رێکەفتنەکێ یە دنافبەرا پارتێن کوردی دا ل ھەرێما کوردستانێ.
نەجمانی ئەو ژی گۆت: بلا ب رەشبینی نە سحکەینە سالا 2016 چونکە ئەم وەک مرۆڤ و چێبوونا کێشان د ژیانا سیاسی دا ل کوردستانێ و پەیوەندیان ل گەل بەغدا، ھیڤی خازین ل سالا داھاتی بابەتێ دارایی و خورتکرنا پەیوەندیان دناڤبەرا ئالیێن سیاسی دا بەر ب باش بوونێ ڤە بچن و کاودانێن خەلکی بھێنە خوشتکرن و دیسا 2017 مللەتێ بگەھیتە ئارمانجا خوە ئەو ژی راگەھاندنا دەولەتا کوردی یە، دیسا کونفرانسێ زانکویا ئەمریکی ل دھۆکێ بەرھەڤی و دەسپێکن بۆ راگەھاندنا دەولەتا کوردی، پێدڤی یە بەرھەڤی بھێنەکرن کو شاندەک بچیتە بەغدا و دیسا وەلاتێن دەر دور و بابەتێ سەربەخۆیا کوردستانێ ب روون و ئاشکرا بھێتە بەحسکرن.
فەرسەت سوفی ئەندامێ پەرلەمانێ کوردستانێ ژ لیستا پارتی دیموکراتی کوردستان گۆت: د مێژوویا مللەتێ کورد دا گەلەک ژ سالێن 2016 نەخوشتر و خراپتر ھەبووینە مە سال و قوناغێن برا کوژیێ دەربازکرینە و ئەو سال گەلەک ژ 2016 خراپتر بووینە، گەشبینم سالا نوو 2017 دێ ژ 2016 باشتر بیت ژ ھەموو روویەکی ڤە، ئومێد مە ھەنە پەیوەندیێن پارتێن کوردی بەر ب باشبوونێ بچن و دیسا ئومێد ھەیە شەرێ داعش بەر ب دووماھیێ یێ دچیت و دیسا ب ھیڤی نە وەک سالێن بوری مە شەھید و بریندار نابن و دیسا ژ بەر بلندبوونا بھایێ بەرمیلا پەترۆلێ پێشبینی دکەین کاودانێن دارایێن وەلاتیان بەر ب باشبوونێ ڤە بچن.
رەمەزان کێڤلی چاڤدێرێ سیاسی گۆت: پەیوەندیێن پارتێن کوردی ل ھەرێما کوردستانێ ژ ھەموو روویەکی ڤە ل ئاستەکێ گەلەک لاواز بووینە و سالا 2016 سالا تێکچوونا پەیوەندیان بوو دنافەبرا پارتێن کوردی دا ل سەر ئاستێ نافخوە و دەرڤەی ھەرێما کوردستانێ ژی و ھەتا سەر ئاستێ ھەر چارپارچێن کوردستانێ ژی و ئەڤێ چەندێ ژی رەھەندێن خوە ھەنە.
کێڤلی ئەو ژی ئاشکراکر کو ھەموو پارتێن سیاسی خودان پرۆژێن خوەیێن تایبەت ل گور ھزر خوە دارشتینە و ھەموو پارتێن کوردی نەشیاینە ببنە خودان ئێک پرۆژە و خالێن ناکوک کێم بکەن و یێن ھەڤپشک زێدە بکەن، لەوما 2016 ب سالا تێکچوونا پەیوەندیان دھێـتە نافکرن.
رەمەزن ئەو ژی گۆت: پێشبینی دھێتەکرن پشتی دانوستاندێن پارتی دیموکراتی کوردستان ل گەل ئالیێن سیاسی دوبارە پەیوەندیێن پارتێن سیاسی بەر ب قوناغەکا ساخلەمتر ژ نوکە و باشتر بچن و دروستکرنا ژێرخانەکا پەیوەندیێن راستەقینە دنافبەرا پارتێن سیاسی دا ل سەر بنەمایێ دارێتنا پرۆژەکێ نەتەوەیی چونکە گھورینێن ەز یێ ل رۆژھەلاتا ناڤین پەیدا دبن و دڤێت پارتێن کوردستانی خودان پرۆژەکی نەتەوەیی بن، ھەتا بشێن ڤێ قوناغێ دەربازبکەن و ئەگەر پارتێن کوردی ل باشورێ کوردستانێ ئەگەر نە گەھنە رێککەفتنێ ل سەر بنەمایێن نەتەوەیی ئەز دبێژم دێ بیتە سالا ژ دەست دانا مافێن مللەتێ کورد.
