سالح موسلم: مە دەولەتا کوردی نەڤێت
ئەڤرۆ نیوز:
ھەڤسەرۆکێ پارتیا ئێکەتیا دیموکراتیک ل سووریێ بۆ رۆژنامەکا تورکیا دیار کریە کو ئەو بەرھەڤێن ھەموو پرسێن خوە ل گەل تورکیا چارە بکەن و دیار کریە کو وان دەولەتا کوردی نەڤێت و کورد دشێن د ناڤ سیستەمەکێ فیدرالی دا ل گەل خەلکێ سووریێ بژین.
سالح موسلم ھەڤسەرۆکێ پەیەدێ بۆ رۆژناما ئۆکاز یا تورکیا دیار کریە کو ئەو بەرھەڤن ل گەل تورکیا دانوستاندنان بکەن دا کو ئاریشێن د ناڤبەرا خوە دا چارە بکەن، ھەر دەمەکێ تورکیا داخوازا دانوستاندنان ژ مە بکەت ئەم بەرھەڤین و گۆت: (مە دڤێت وەکو کوردێن سووریێ مە پەیوەندیێن باش ل گەل تورکیا ھەبن، مە چو دەولەت نەڤێت، چونکو دەولەت بوونە بناغێ ھەموو ئاریشان و ژ بەر ھندێ ژی مە دڤێت وەکو کوردێن سووریێ د ناڤ سیستەمەکێ دیموکراتیک دا ل گەل خەلکێ دی یێ سووریێ بژین و ژ بەر ھندێ ژی مە داخوازا ئاڤاکرنا دەولەتا کوردی نەکریە و ناکەین ژی).
سالح موسلم سەبارەت ب پرسا کوردی ل رۆھەلاتێ کوردستانێ ژی دیار کریە کو وان چو پەیوەندی ل گەل پرسا کوردێن پارچێن دی یێن کوردستانێ نینە و تنێ وان دڤێت پرسا کوردی ل سووریێ بھێتە چارەکرن و کوردێن ل پارچێن دی یێن کوردستانێ ژی دڤێت ب خوە بریارێ ل سەر چارەنڤیسێ خوە بدەن و گۆت: (مە سیستەمەکێ وەکو یا ھەرێما کوردستانێ نەڤێت، چونکو ئەو سیستەم ل سەر بنەمایێ نەتەوی ھاتیە ئاڤا کرن، چونکو مە دڤێت سیستەمەکێ دیموکراتیک ئاڤا بکەین کو ھەموو پێکھاتێن رۆژئاڤایێ کوردستانێ تێدا پشکدار بن و ئارمانجا مە ژی ئەڤە وەکو برا ل گەل پێکھاتێن دی یێن رۆژئاڤایێ کوردستانێ بژین).
ھەڤسەرۆکێ پەیەدێ د پشکەکا دی یا ئاخڤتنا خوە دا ئەو یەک ژی دیار کر کو وان رۆلەکێ سەرەکی د شەرێ ل دژی داعشێ دا گێرایە و شیاینە دربێن کوژەک ل وێ رێکخراوا تیرۆرستی بدەن و خەلکێ خوە ل رۆژئاڤا ب پارێزن و ژ بەر ھندێ ژی ئەمریکا ھاریکاریا چەکی دایە وان و نھا ژی چەندین بنگەھێن سەربازی یێن ئەمریکا ل رۆژئاڤایێ کوردستانێ ھەنە و ئەم ھێڤدارین کو رێڤەبەریا نوو یا ئەمریکا بەردەوام ھاریکاریا مە بکەت، چونکو بێی ھێزێن کوردی کەس نەشێت داعشێ ل سووریێ ژناڤ ببەت و گۆت: (مە چو ئاریشە ل گەل تورکیا ژی نینن و ئەم ھێڤدارین کو بەرپرسێن تورکیا ژی بۆچوونا خوە ل ھەمبەر مە ب گوھۆرن چونکو مە نەڤێت چو ئاریشە د ناڤبەرا مە و تورکیا دا ھەبن، ژ بەر ھندێ ژی ھەر دەمەکێ بەرپرسێن تورکیا داخوازا دانوستاندنان ژ مە بکەن ئەم بەرھەڤین ل گەل تورکیا دانوستاندن بکەین و مە چو مەرج ژی نینن).
