سزایێن ل سەر ئیرانێ د بەرژەوەندیا چەندین وەلاتان دانە
ئه‌ڤرۆ نيوز:
مایک پۆمپیۆ وەزیرێ دەرڤە یێ ئەمریکا د داخۆیانیەکی دا راگەھاند کو دەمێ وێ یەکێ ھاتیە سزایێن ئابووری، سەربازی و سیاسی یێن ل سەر ئیرانێ بکەڤنە د وارێ بجھکرنێ دا و گۆت: (ئیران ھەتا نھا ژی دخوازیت جیھانێ بخاپینیت و بەرنامێ خوە یێ ئەتۆمی بەردەوام دکەت و ل جیھانێ بەردەوام پشتەڤانیا تیرۆرێ دکەت و بۆ ڤێ چەندێ ژی دێ 4-11-2018 بریارا مە یا سزایێن ئابووری بکەڤیتە وارێ بجھکرنێ دا).
د ڤێ مژارێ دا جێگرێ وەزیرێ پەترۆلێ یێ ئیرانێ ژی راگەھاند کو ئەو دەولەتەکا مەزن یا بەرھەمئینەرێ پەترۆلێ نە و چو ئالیەک نەشێت پەترۆلا ئیرانێ ژ بازارا جیھانێ دوور کەت و گۆت: (دەستپێکێ ئەمریکا دخواست مە ب تەمامی ژ بازارا پەترۆلێ دوور کەت لێ پێدڤیا بازارا جیھانێ ب پەترۆلا مە ھەیە و بۆ ڤێ چەندێ ژی رێ ددەتە ھەشت دەولەتان کو ل گەل مە بازرگانیێ بکەن و ئەڤ بریارا بجھکرنا سزایێن ئابووری ل سەر مە نە د بەرژەوەندیا چو ئالیەکێ دایە).
ل ئالیێ دی وەزیرێ وزێ و ژێدەرێن سروشتی یێ تورکیا ژی راگەھاند ئەمریکا قەبوول کریە کو ئەو وەک تورکیا بەردەوامیێ بدەنە بزاڤێن بازرگانیێ و گۆت: (ئیران جیرانێ مەیە و ب رەزمەندیا ئەمریکا ئەم دێ بازرگانیا ل گەل ئیرانێ بەردەوام کەین و ئەو یەک د بەرژەوەندا ھەموو ئالیان دایە و ئەم سوپاسیا ئەمریکا دکەین کو رەوشا مە یا تایبەت ل ھەرێمێ بەرچاڤ گرتیە).
