سعوودیێ بەرھەڤیا خوە بۆ لێدانا داعش راگەھاند و ئەمریکا یا بێدەنگە
ئەڤرۆ نیوز:
ئەحمەد عەسیری شیرەتکارێ وەزیرێ بەرگیریێ سعوودیێ راگەھاند کو دەمەکە ئەم ل گەل ئەمریکا دانوستاندنان دکەین دا کو د دەمەکێ گونجای دا ھێرشی داعشێ ل سووریێ بکەین، چونکو ھەتا داعش و رێکخراوێن وەکو وێ ل سووریێ بمینن رەوشا وی وەلاتی ئارام نابیت و گۆت: (ھەتا نھا ئەمریکا بەرسڤەکا ئاشکرا و زەلال نەدایە مە، لێ نھا فرۆکێن مە ل ئینجرلیکا تورکیا ھاتنە بجە کرن و د دەمێ پێدڤی دا ئەم دێ ھێرشی داعشێ ل سووریایێ کەین).
ناڤھاتی ئەو یەک ژی دیار کر کو ھەتا ئەمریکا و ھەڤپەیمانیا نێڤدەولەتی یا ل دژی داعشێ رزامەندیا خوە نیشا نەدەن ئەم ھێرشی داعشێ ل سووریایێ ناکەین، ژ بەر ھندێ ژی ھەتا نھا مە دەست ب چو ھێرشان نەکریە و ھەکە ئەمریکا رزامەندیا خوە نیشا بدەت وەلاتێ مە بەرھەڤە ب ھەموو رەنگەکێ ل سووریێ شەرێ داعشێ بکەت و وێ رێکخراوا تیرۆرستی ل سووریایێ دەرخینیت.
چاڤدێرێن سیاسی ژی دیار دکەن کو ئەمریکا گومان ل سەر ھەلویستێ سعوودیێ و تورکیا و وەلاتێن دی یێن عەرەبی ھەیە و روسیا ژی بەری نھا ھۆشداری دایە ئەمریکا کو نابیت ئەو بھێلن سعوویە و تورکیا ھێرشی سووریایێ بکەن، چونکو مەبەستا وان شەرێ ل دژی داعشێ نینە بەلکو وان دڤێت ل ژێر ناڤێ شەرێ ل دژی داعشێ ھەرێمەکێ ئاڤا بکەن و کار بۆ بەرژەوەندیێن خوە بکەن و ژ بەر ھندێ ژی ھەتا نھا ئەمریکا چو ھەلویستەکی فەرمی سەبارەت ب ھێرشێن سعوودیێ ل سووریێ دیار نەکریە و ھەکە ئاگربەستا ل سووریێ بھێتە بجە ئینان ئەمریکا ناھێلیت سعوودیێ دەست ب کارەکێ وەسا بکەت.
