سه‌ده‌ما توركیا پالدای فرۆكا رووسی بئێخیت چێدبیت گرێدان ب كوردان ڤه هه‌بيت
ئه‌ڤرۆ نیوز: ڤه‌ده‌ر ره‌شاڤایی:
سه‌ده‌ما ئێخستنا فرۆكه‌كا سه‌ربازییا رووسی بۆ ئێكه‌م جار ژ ئالیێ توركیا ڤه هێشتا نه‌یا دیاره، لێ چه‌ندین سیناریۆ ل پشت ڤێ روودانا كو په‌یوه‌ندیێن رووسیا و توركیا ژ ئالۆزیێ بۆ كاره‌ساتباریێ برین هه‌نه.
ژێده‌ره‌كێ هه‌والگیرییا رووسی بێ دیاركرنا ناڤێ خوه بۆ رۆژناما (ِAsia Times) دبێژیت كو هێشتا زوویه تشته‌كێ سه‌د سه‌دێ بهێته گۆتن كو سه‌ده‌م بیت و وه ل توركیا كربیت ڤێ تشتێ مه‌زن بكه‌ت، لێ دو سیناریۆیێن هه‌ره سه‌ره‌كی ب كوردان و توركمانان ڤه گرێداینه.
وی ژیده‌ری گۆتیه: چێدبیت فرۆكێن رووسی پشته‌ڤانی بۆ شه‌رڤانێن كورد ل سوری (رۆژئاڤا كوردستانێ) پێكشكێش كربیت و ترس ل ده‌ڤ ئه‌نقه‌ره دروست كربیت كو رووسیا پشته‌ڤانییا په‌كه‌كێ دكه‌ت.
یا دوویێ دهێته گۆتن كو رووسیا هێرشی گوندێن توركمانان ل سه‌ر سنۆرێ دناڤبه‌را سوریا و توركیا كربن د حه‌فتیا بۆری دا، ڤێ یه‌كێ ژی توره‌یی و بێزاری لده‌ڤ ئه‌نقه‌ره دروست كرییه.
هه‌ڤده‌م ڤی ژێده‌ری نه‌ڤاشارت كو پشتی رووسیا چه‌ندین بارهه‌لگرێن نه‌فتێ یێن داعش كو نه‌فت ژ سوریا بۆ توركیا دبر د ئۆپه‌راسیۆنێن ئاسمانی دا ژناڤ بری و ئه‌ڤ بابه‌ته كرییه سه‌ر به‌ركێ، وه‌كی شه‌رمزاری و دربه‌كێ بوو ژبۆ به‌رژه‌وه‌ندیێن سه‌ربازیێن توركیا ل سوریا.
لدووڤ گۆتنا شرۆڤه‌كاران چێدبیت رووسیا برێیا زێده‌كرنا پشته‌ڤانیكرنا نه‌راسته‌وخۆ یا كوردێن رۆژئاڤا كوردستانێ و پشته‌ڤانیكرنا شه‌رڤانێن په‌كه‌كێ و زێده‌كرنا بهایێ گازا رووسی تۆلا خوه ژ توركیا ڤه‌كه‌ت.