سه‌ربه‌ست له‌زگين مه‌ترسيه‌كا مه‌زنا حه‌شه‌د شه‌عبى ل سنورێ شنگال ئاشكه‌را دكه‌ت
ئه‌ڤرۆ نيوز:
سه‌رپه‌رشتێ ميحوه‌رێ شنگال راگه‌هاند كو مه‌ره‌م ژ رزگاركرنا قه‌يره‌وان ژ لايێ حه‌شه‌د شه‌عبى ڤه ئه‌و بوو سنورێن خوه بگه‌هيننه سوريا دا كو بگه‌هنه گرۆپێن چه‌كدارێن شيعى يێن وه‌كو حزبولا.
سه‌رپه‌رشتێ ميحوه‌رێ شنگال، سه‌ربه‌ست له‌زگين، د داخۆيانيه‌كا رۆژنامه‌ڤانى دا ئاشكه‌را كر كو بڕيار بوو قه‌يره‌وان ب هه‌مانگيا هه‌ولێر و به‌غدا هاتبا كونترۆلكرن، به‌لێ حه‌شه‌د شه‌عبى رێكه‌فتنا ناڤبه‌را هه‌ولێر و به‌غدا بن پێ كر و بێ هاريكاريا هه‌رێمێ باژێركێ قه‌يره‌وان يێ سه‌ر ب شنگال رزگاركر.
سه‌رپه‌رشتێ ميحوه‌رێ شنگال ئاماژه ب وێ چه‌ندێ ژى كر كو وه‌كو حه‌شه‌د شه‌عبى هه‌وێ بۆ دكه‌ت ئه‌وان ئه‌و ئۆپه‌راسيۆن ئه‌نجام دايه دا كو بگه‌هنه سنورێ سوريا، “به‌لێ د راستى دا ئه‌و جهێ حه‌شه‌د شه‌عبى شه‌رى لێ دكه‌ت، 60 بۆ 70 كيلۆمه‌تران يێ ژى سنورێ سوريا دووره”.
سه‌ربه‌ست له‌زگين مه‌ره‌ما سه‌ره‌كى يا حه‌شه‌د شه‌عبى ژ ڤێ ئۆپه‌راسيۆنێ ئاشكه‌را كر و گۆت: “مه‌ره‌ما سه‌ره‌كى يا ڤێ ئۆپه‌راسيۆنێ ڤه‌كرنا رێيا هشكاتيێ يه د ناڤبه‌را عيراق و سوريا دا ل گه‌ل حزبولا يا لوبنانى و گرۆپێن دى يێن شيعى و ئه‌ڤه ژى گه‌فه ل سه‌ر گۆند و ده‌ڤه‌رێن سنورى ل سوريا”.
خۆيا ژى دكه‌ت كو هێزێن پێشمه‌رگێ كوردستانێ قه‌بول ناكه‌ن چو بۆسته‌كا ئاخا كوردستانێ ل بن ده‌ستێ چو هێزێن بيانى بيت و ب مانا حه‌شه‌د شه‌عبى ل ده‌ڤه‌رێ دێ “مه ژى هه‌لويستێ خوه هه‌بيت”.
به‌رى سێ رۆژايه چه‌كدارێن حه‌شه‌د شه‌عبى باژێركێ قه‌يره‌وان دوورپێچ كريه بێ ى هاريكارى و لڤينێن پێشمه‌رگێ كوردستانێ، به‌لێ وه‌كو سه‌ركردێن پێشمه‌رگه‌ى دده‌نه دياركرن ئه‌و بۆ هه‌ر ئه‌گه‌ره‌كێ نه‌چاڤه‌رێكرى د ئاماده‌باشيێ دانه.
بۆ ماوێ سێ سالايه 13 گۆند و كۆمه‌لگه‌هێن كوردێن ئێزدى ل شنگال د بن ده‌ستێ چه‌كدارێن داعش دانه و هه‌تا نوكه نه‌هاتينه ئازادكرن.
