سه‌ركردایەتیا سیاسی یا كوردستانێ:چو هێرش و گوشار گه‌لێ كوردستانێ ژ بریارا 25 ئیلۆنا 2017 پاشگەز ناكەن
ئەڤرۆ نیۆز،زنار تۆڤی:
سه‌ركردایه‌تیا سیاسی یا كوردستانێ ئه‌ڤرۆ ب سه‌رپه‌رشتیا مه‌سعود بارزانی سه‌رۆكێ هه‌رێما كوردستانێ كۆمبوویە و ل دوماهیا كۆمبوونێدا د چارچوڤێ راگه‌هاندنەكێدا دوپات كر كو هیچ هێرش و گوشارەک گه‌لێ كوردستانێ ژ بریارا 25 ئیلۆنا 2017 پاشگەز ناكەن.
د كۆمبوونێدا ئێکرێزی و ئێک گۆتار یا هێز و لایەنێن سیاسیی ب كلیلا پاراستن و سەركەفتنا گەلێ كوردستانێ زانیە،جەخت ژی ل رەوایەتیا بریارا گەلێ كوردستانێ و پارێزگاری ژ بریار و دەستكەفتان كریە.
د كۆمبوونێدا دوپاتكریە كو گەلێ كوردستانێ یێ خۆراگرە و یێ رژدە ل سەر دیالۆگێ، ب پشت بەستن ب میكانیزما ئاشتیانە و هیچ هێرشەک و گوشارەك ل بریارا 25 ئیلۆنێا2017 پاشگەز ناكەتەڤە.
ئه‌ڤا ل خوارێ ده‌قێ وێ راگەهاندنێ یە:
راگەهاندنەک ژ سەركردایەتیا سیاسی یا كوردستانا – عێراقێ.
رۆژا ئێکشەمبی 1 چریا ئێکێ 2017 ل سەلاحددین سەركردایەتیا سیاسی یا كوردستانا_ عێراقێ ب سەرپەرشتیا بەرێز مەسعود بارزانی و ئامادەبوونا بەرێز كۆسرەت رەسوول عەلی كۆمبووینە.
د وێ کۆمبوونێدا پشتی گوتۆبێژکرنا دوماهی پێشهاتێن سیاسی و هەروەسا گۆهارتنا بیر و رایان دەربارەی كارڤەدانێن كۆمەلگەهێ نێڤدەولەتی و رێكار و كارڤەدانێن بەغدا ل بەرامبەری دەنگێ ئاشتیانە یێ گەلێ كوردستانێ و ریفراندۆم و چاوانیا مامەلەکرنێ ل گەل كارڤەدانان و پێشبینیكرنا هەلویست و پێنگاڤێن داهاتی، ئامادەبوویێن وێ كۆمبوونێ گەهشتنە ڤان ئەنجام و بریارێن ل خوارێ:
ئێكەم:كۆمبوونێ سوپاسیا هەموو وەلاتیێن كوردستانێ و پێكهاتێن نەتەوەیی و ئایینی و لایەنێن سیاسی كر و كو ب ئێكرێزی و هەڤدەنگی ب شێوەیەكێ ئاشتیانە و مەدەنی بەشداری د پرۆسا ریفراندۆمێ دا كر و پیرۆزباهیا وێ سەركەفتنا مێژوویی ل گەلێ كوردستانێ كر.
دویەم:كۆمبوونێ سوپاسیا ئەرك و ماندووبوونا جڤاتا بلند یا ریفراندۆمێ دکەت،کو پشتی راپەراندنا پرۆسا ریفراندۆمێ دوماهی ب ئەركێن خۆ ئینایە.
سێیەم: كۆمبوونێ جەخت ل بەردەوامیا زمانێ حیوارێ ل گەل بەغدا و هەلویست و پەیاما ئاشتیخوازا گەلێ كوردستانێ بۆ عێراقێ و دراوسێیان دکەت و پێشوازی ل بانگەوازا ئایەتوللا سەید سیستانی ل بەر گرتنەبەرا دیالۆگێ دکەت و ب شێوەیەكێ فەرمی ژی بەرسڤا وێ بانگەوازا ئایەتوللا سەید سیستانی ددەت.
چارەم: كۆمبوونێ جەخت ل پاراستنا سەقامگیریا هەرێما كوردستانێ دکەت و هەر جۆرە هێرشێ و سەپاندنا سزایی ب كۆمەل ل سەر خەلکێ كوردستانێ رەت دکەت و پالپشتیا خۆ ژی بۆ بەرسڤا پەرلەمان و حوکمەتا هەرێما كوردستانێ ل بەرامبەر بریار و رێوشوێنێن بلەز یێن بەغدا ل دژی خەلكێ كوردستانێ دوپات كریە.
پێنجەم:ئەڤ كۆمبوونە كۆمەلگەهێ نێڤدەولەتی ژ هندێ دلنیا دکەت،کو ریفراندۆم و دەنگێ ئاشتیانە یێ گەلێ كوردستانێ ب هیچ شێوەیەكێ هێرشێ ل سەر سەقامگیری و ئاشتییا ڤێ دەڤەرێ دروست نەكریە و داخوازا سەرەكی یا گەلێ كوردستانێ ئاشتی و پێكڤە ژیانە و داخواز كریە کو كۆمەلگەها نێڤدەولەتی رێزێ ل ئیرادە و دەنگێ ئاشتیا گەلێ كوردستانێ بگریت.
شەشەم: كۆمبوونێ وێرای دەربرینا دەستخۆشیێ و پێزانینا بۆ رۆلێ دەزگەهێن راگەیاندنێ كو رۆلەکێ باش د پرۆسا ریفراندۆمێدا هەبوویە،تەئكید ل هندێ ژی کریە کو پێدڤیە رۆلێ راگەهاندنا نافخۆ د خزمەتا بەرژەوەندیا نەتەوەیی و نیشتیمانیدا بیت، ئامادەبوویێن كۆمبوونێ ل سەر هندێ هەڤرابوون، كو پێدڤیە د چارچۆڤێ یاسا و سنوورەک بۆ وان هەولان بهێتە دانان،یێن کو ب ئاراستەیا دژایەتیكرنێ و مافێ گەل و بەرپاكرنا شەرێ دەروونی و پێشێلكرنا سەركەفتنا گەلێ كوردستانێ كار دكەن.
حەفتەم:كۆمبوونێ ئێکرێزی و ئێک گۆتاریا هێز و لایەنێن سیاسی ب كلیلا پاراستنا سەركەفتنێن گەلێ كوردستانێ زانیە، جەخت ل رەوایەتیا بریارا گەلێ كوردستانێ و پارێزگاری ل وان بریار و دەستكەفتان كریە،وێ كۆمبوونێ دوپاتكریە كو گەلێ كوردستانێ خۆراگرانە و یێ رژدە ل سەر دیالۆگێ،ب پشت بەستن ب میكانیزما ئاشتیانە و هیچ هێرش و گوشارەکێ ل بریارا 25 ئیلۆنێ 2017 پاشگەزی ناكەت.
سەركردایەتیا سیاسی یا كوردستانا _ عێراقێ
1 چریا ئێکێ 2017