سه‌ركردێن داعش ژنێن ئێزدى به‌ر ب ڤى جهى ڤه ره‌ڤاندينه
ئەڤرۆ نیوز:
رێڤەبەرێ کاروبارێن ئێزدیان ل پارێزگەھا دھۆکێ دیار کر، ژ دەستپێکا ئۆپەراسیونا رزگارکرنا فەللوجە ھەتا نوکە ب تنێ دو کچێن ئێزدی ژ دەستێن داعشێ ل وی باژێری ھاتینە رزگارکرن و دبێژیت: تیرۆرستێن داعش خێزانێن خوە و رەڤاندیێن ئێزدی ژی ژ فەللوجە بەر ب سووریا ڤەگوھاستینە ب تایبەتی باژێری رەقە.
ھادی دوبانی، رێڤەبەرێ کاروبارێن ئێزدیان ل پارێزگەھا دھۆکێ ئاشکرا ژی کر، ل دووڤ پێشبینیا رێڤەبەریا کاروبارێن ئێزدیان 150 کچ، ژن و زارۆیێن ئێزدی ل فەللوجە بوون و بۆ ئەڤرۆ گۆت: “ئەڤە سێ چارێکێن باژێری ھاتنە رزگارکرن، لێ ھەتا نوکە چو دیارنینە و چارەنڤیسێ کەسێن رەڤاندی د ناڤ فەللوجە دا ھێشتا ئاشکرا نەبوویە”.
دوبانی ئەو ژی دیار کر، پشتی نووچەیێ رزگارکرنا 354 کچێن ئێزدی ل فەللوجە ھاتیە بەلاڤکرن، مە دەست ب ڤەکۆلینان کر و گەلەک دووڤچوون ھاتنە کرن، لێ دیاربوو چو راستی بۆ رزگارکرنا 354 کچین ئێزدی ل فەلووجە ژ لایێ حەشدا شەعبی ڤە نینە و گۆت: “ئەم داخوازێ ژ ھەموو لایەکی دکەین ھەستێ خەلکێ مە ژ لایێ حەشدا شەعبی و تۆرێن جڤاکی ڤە نەھێتە بریندارکرن”.
خویا ژی کر، ل دووڤ ھندەک ژێدەران سەرکردێن تیرۆرستێن داعشێ خیزانین خوە ل فەللوجە بەر ب وەلاتێ سووریا دبەن و گۆت: “تیرۆرستێن داعشێ رەڤاندیێن ئێزدی ژی ل گەل خوە بۆ سووریا و ب تایبەتی باژێری رەقە برینە، ئەم داخوازێ ژ ھێزین ھەڤپەیمان و ھەموو ھێزین پشکدار د رزگارکرنا فەللوجە دا دکەین گیانێ رەڤاندیان ب پارێزن”.
رێڤەبەری کاروبارین ئێزدیان ئاماژە ب وێ چەندێ ژی کر، ل ھەر دەڤەرەکا تیرۆرستێن داعش ھەبن بێ گۆمان رەڤاندیێن ئێزدی ژی دێ لێ ھەبن و گۆت: “ئەو سەرکردێن داعش یێن بەر ب سووریا رەڤین، وان رەڤاندیێن ئێزدی ل گەل خوە بۆ وی وەلاتی و باژێرێ رەقە برینە”.
