سه‌رنڤيسكارێ رۆژناما ئه‌ڤرۆ نامه‌كا گرنگ به‌لاڤ دكه‌ت
ئه‌ڤرۆ نيوز:
سه‌رنڤيسكارێ رۆژناما ئه‌ڤرۆ ب هه‌لكه‌فتا بۆرينا 16 سالان ل سه‌ر ده‌ركه‌فتنا رۆژناما ئه‌ڤرۆ نامه‌ك بۆ خوانده‌ڤان و جهێن به‌رپرس نڤيسيه و تێدا ئاماژه ب وێ چه‌ندێ دكه‌ت كو رۆژنامه‌ڤانيا نڤيسينى يا به‌ر ب دووماهيێ دچيت و چاره‌سه‌ر ژى رۆژنامه‌ڤانيا ئه‌لكترۆنى يه.
د. رێبەر فەتاح، سه‌نڤيسكارێ رۆژناما ئه‌ڤرۆ د گۆتاره‌كێ دا ب هه‌لكه‌فتا سه‌رسالا وێ پيرۆزباهيا ھەموو خوەندڤانێن رۆژنامێ دکەت و دبێژيت: “ئەم ب ھیڤی وئومێدین کو رۆژێن داھاتی د ژیێ کارێ مەیێ رۆژنامەڤانی دا دێ گەشتر وب رەوشتر بن ب ئارمانجا بەردەوامیێ ب کارێ رۆژنامەڤانی ل دەڤەرا بەھدینان وخزمەت کرنا خەلک وزمان ونیشتمان وئاخا پیروزا کوردستانێ کو ببینە لینکەک دناڤبەرا خەلک ودەسھەلاتێ دا وچاڤێ دەسھەلاتا چارێ بین بو بەرچاڤکرنا کێماسیان ھەموو ژی پێخەمەت ئارمانجەکا مەزنتر کو ئاڤاکرنا کوردستانەکا شارستانی وئازادە”.
سه‌نڤيسكار د گۆتارا خوه يا ئه‌ڤرۆ به‌رپه‌رێ ئێك يێ ژماره 2397 به‌لاڤ بوويى ئاشكه‌را دكه‌ت كو ل گەل بورینا دەمی ھەموو تشتەک دگوھۆرینێ دایە و ھوسا ژی کارێ رۆژنامەڤانی ب گشتی بەردەوام شێواز و رێبازێن خوە دگوھۆریت و دبێژيت: “راستیە کو دەمێ رۆژنامەگەریا کاغەزی بەرف نەمانێ یە، به‌لێ مە باوەریا ھەيی کو د ناف تەکنولوژیا نھا ژی دا ئەم بشێين بگەھینە خوێندڤانی و زمان حالێ خەلکی بین”.
زێده‌تر دبێژيت: “دبیت تیراژێ کاغەزی و فرۆشێ رۆژنامێ بەر ب کێمبوونێ بچیت، لێ ئەلکترونی کرنا رۆژنامێ و دەست بکار بوونا سایتێ ئەڤرۆنیوز و بکار ئینانا تۆرێن جڤاکی ئەم دخزمەتا خەلکێ خوە داینە و ژ دوھی پتر و ب لەزتر ئەڤرۆ ئەم ھەڤخەم وھەڤکارێن خوێندڤانی نە و ئەم رژدین کو ل ئاستێ باوەریا کاری رۆژنامەڤانی بین بۆ ڤەدیتن و گەھاندنا راستیێ ئەو راستیا کو باوەریا خەلکی ب رۆژناما ئەڤرۆ بەردەوام بھێلیت و ھیڤی دکەین ل ئاستی باوەریا خەلکی بین”.
